റയലിന് ആശ്വാസം, യുവന്റസിന് നാടകീയ സമനില; യൂറോപ്പിൽ ലീഗ് പോരാട്ടം

ലെവാന്റെയുടെ മൈതാനത്ത് നടന്ന ലാ ലി​ഗ മത്സരത്തിൽ അഞ്ചാം മിനിറ്റിൽ തന്നെ ​ഗാരത് ബെയിലിലൂടെ റയൽ മുന്നിലെത്തി. എന്നാൽ രണ്ടാം പകുതി തുടങ്ങി തൊട്ടുപിന്നാലെ റോജർ മാർട്ടിയിലൂടെ ലെവാന്റെ ഒപ്പമെത്തി. 57-ാം മിനിറ്റിൽ ഹോസെ കംപാനയുടെ ​ഗോളിലൂടെ ലെവാന്റെ റയലിനെ ഞെട്ടിച്ച് ലീഡ് നേടി.‌

ഇതിനുപിന്നാലെ റയൽ പരിശീലകൻ കാർലോ അഞ്ചലോട്ടി ചില മാറ്റങ്ങൾ വരുത്തി. ഇതിന്റെ ഫലം 73-ാം മിനിറ്റിൽ കണ്ടു. പകരക്കാരനായിറങ്ങിയ വിനിഷ്യസിലൂടെ റയൽ ഒപ്പമെത്തി. എന്നാൽ ആറ് മിനിറ്റിനകം റോബർ പിയെറിലൂടെ ലെവാന്റെ ലീഡ് തിരിച്ചുപിടിച്ചു. തോൽവി നേരിട്ട ഘട്ടത്തിൽ വിനിഷ്യസ് വീണ്ടും റയലിന്റെ രക്ഷകനായി. 85-ാം മിനിറ്റിൽ ബ്രസീലിയൻ വിങ്ങർ നേടിയ ​ഗോളിൽ റയൽ സമനില പിടിച്ചുവാങ്ങി.

സെരി എയിൽ യുഡിനിസാണ് യുവന്റസിനെ സമനിലയിൽ തളച്ചത്. ഇരുക്ലബുകളും രണ്ട് ​ഗോൾ വീതം നേടി. പൗളോ ഡിബാല,ജുവാൻ ക്വാഡ്രാഡോ എന്നിവരുടെ ​ഗോളുകളിൽ ആദ്യ 25 മിനിറ്റിനുള്ളിൽ തന്നെ യുവന്റസ് മികച്ച ലീഡ് നേടിയതാണ്. എന്നാൽ രണ്ടാം പകുതിയിൽ റോബർട്ടോ പെരേയ്ര, ജെറാർഡ് ഡ്യൂലോഫു എന്നിവരുടെ ​ഗോളുകളിൽ യുവന്റസ് ഒപ്പമെത്തി. മത്സരത്തിന്റെ അവസാന മിനിറ്റിൽ ക്രിസ്റ്റ്യാനോ റൊണാൾഡോ യുവന്റസിനായി വലകുലുക്കിയെങ്കിലും, ​ഗോൾ അനുവദിച്ചില്ല.

സെരി എയിലെ മറ്റ് പ്രധാന മത്സരങ്ങളിൽ റോമ ഫിയോറെന്റിനയേയും നാപ്പോളി വെനെസിയയേയും തോൽപ്പിച്ചു. ലാ ലി​ഗയിൽ അത്ലെറ്റിക്കോ മഡ്രിഡ് എൽച്ചെയെ എതിരില്ലാത്ത ഒരു ​ഗോളിന് വീഴ്ത്തി. ഇം​ഗ്ലണ്ടിലെ സൂപ്പർപോരാട്ടമായ ലണ്ടൻ ഡെർബിയിൽ ചെൽസി എതിരില്ലാത്ത രണ്ട് ​ഗോളിന് ആഴ്സനലിനെ തോൽപ്പിച്ചു.