നിലവിൽ ബ്രിട്ടനിലെ എച്ച് ജിവി ഡ്രൈവർമാരുടെ ശരാശരി പ്രായം 55 വയസാണ്. പക്ഷേ, ആകെയുള്ള ഡ്രൈവർമാരിൽ ഒരു ശതമാനത്തിൽ താഴെ മാത്രമാണ് 25 വയസിൽ താഴെ പ്രായമുള്ളവർ. ഓരോ ആഴ്ചയിലും രണ്ടായിരത്തോളം ഡ്രൈവർമാർ ഈ ഇൻഡസ്ട്രിയിൽനിന്നും വിരമിക്കുമ്പോൾ പുതുതായി എത്തുന്നത് കേവലം ആയിരം പേർ മാത്രവും. ഇത്തരത്തിലുള്ള അന്തരങ്ങളാണ് മാസങ്ങൾകൊണ്ടു വളർന്ന് വലിയ പ്രതിസന്ധിയായി പരിണമിച്ചിരിക്കുന്നത്. പുതിയ തലമുറയെ ഈ ജോലിയിലേക്ക് ആകർഷിക്കുന്ന നടപടികൾ മാത്രമാണ് ഇതിനു ശാശ്വത പരിഹാരമെന്നാണ് ഇൻഡസ്ട്രിയിലെ വിദഗ്ധർ പറയുന്നത്.
4000 മുതൽ 7000 പൗണ്ടുവരെയാണ് എച്ച്ജിവി ലൈസൻസ് സ്വന്തമാക്കാൻ ചെലവാകുന്ന തുക. ഇത് പലർക്കു താങ്ങാനാവുന്നതിലും ഏറെയാണ്. 40,000 മുതൽ 50,000 പൗണ്ടുവരെയാണ് ശരാശരി ഒരു ഡ്രൈവർക്ക് ലഭിക്കുന്ന വേതനം. ഇപ്പോഴത്തെ സാഹചര്യത്തിൽ ഇത് 70,000 പൗണ്ടുവരെ ഉയർന്നിട്ടുണ്ടെങ്കിലും സ്ഥിരമായി ഇത് ലഭ്യമാകുന്ന സാഹചര്യം സൃഷ്ടിച്ചാലേ യുവാക്കളെ ആകർഷിക്കാനാകൂ.
5000 ഫോറിൻ ഡ്രൈവർമാർക്ക് അടിയന്തരമായി വീസ അനുവദിച്ച് എത്രയും പെട്ടെന്ന് പ്രതിസന്ധി പരിഹരിക്കാനാണ് സർക്കാർ ശ്രമം. ഒപ്പം ഡ്രൈവിങ് ടെസ്റ്റിന്റെ എണ്ണം കൂട്ടുകയും നടപടിക്രമങ്ങൾ ലഘൂകരിക്കുകയും ചെയ്തിട്ടുണ്ട്. മിലിട്ടറിയുടെ ഭാഗമായ റോയൽ ലോജിസ്റ്റിക്സ് കോർപ്സിന്റെ സഹകരണം തേടി താൽകാലിക പ്രശ്ന പരിഹാരത്തിനും സർക്കാർ ശ്രമിക്കുന്നുണ്ട്.
0 Comments