കായലോരത്ത് യുവാക്കളുടെ കൂട്ടത്തല്ല്; പിന്നിൽ കോളേജ് വിദ്യാർത്ഥിനിയോടുള്ള 'ക്രഷ്'; പ്രണയം നേടാനുള്ള ശ്രമത്തിനിടെ യഥാർത്ഥ കാമുകനിതറിഞ്ഞു; പിന്നെ വൈക്കത്ത് നടന്നത് ചരിത്രം!

പെൺകുട്ടിയും ചേർത്തല സ്വദേശിയും തമ്മിൽ പ്രണയത്തിലായിരുന്നു. ഈ ബന്ധത്തിൽ നിന്ന് പെൺകുട്ടി പിന്മാറിയതോടെ പ്രകോപിതനായ യുവാവ് വൈക്കം കായലോരത്തെത്തി പെൺകുട്ടിയുമായി തർക്കത്തിലേർപ്പെട്ടു. ഇതോടെ വിഷയത്തിൽ പെൺകുട്ടിയുടെ സുഹൃത്തുക്കൾ ഇടപെട്ടു. ആൺ സുഹൃത്തുക്കളെയും കൂട്ടിയാണ് പെൺകുട്ടി മുൻകാമുകനുമായി സംസാരിക്കാൻ എത്തിയതെന്നാണ് വിവരം.

തുടർന്നു കൂട്ടത്തല്ലിൽ ക്രൂരമായ മർദനങ്ങൾക്ക് പുറമേ ബിയർ കുപ്പി കൊണ്ട് ആക്രമിക്കാനും ശ്രമമുണ്ടായി. നാട്ടുകാരിൽ ചിലർ ഈ ദൃശ്യങ്ങൾ പകർത്തിയിരുന്നു. അതേസമയം വൈക്കത്തെ കായലോര ബീച്ചിൽ കാടുപിടിച്ച പ്രദേശം കേന്ദ്രീകരിച്ച് അനശാസ്യ പ്രവർത്തനങ്ങളും ലഹരി ഇടപാടുകളും വ്യാപകമായി നടക്കുന്നുണ്ട്. 

ഇതിൽ എക്‌സൈസ് നടപടി സ്വീകരിക്കണമെന്നാണ് നഗരസഭയുടെ ആവശ്യം. സിസിടിവി കാമറകൾ സ്ഥാപിച്ചിട്ടുണ്ടെങ്കിലും ഇത്തരം പ്രവണതകൾ തടയുന്നതിനുള്ള നടപടികൾ ഉണ്ടായിട്ടില്ല. 

കാടുകയറിയ പ്രദേശങ്ങൾ വൃത്തിയാക്കി കമ്പിവേലിയിടണമെന്നും പൊലീസ് പരിശോധന കർശനമാക്കണമെന്നുമാണ് നാട്ടുകാരുടെ ആവശ്യം.