കേരള ഹൈക്കോടതി മുൻ ജഡ്ജി ജസ്റ്റിസ് വി ഭാസ്കരൻ നമ്പ്യാർ അന്തരിച്ചു

1983 മുതൽ 89 വരെയുള്ള കാലത്താണ് ജസ്റ്റിസ് ഭാസ്കരൻ നമ്പ്യാർ ഹൈക്കോടതി ജഡ്‌ജിയായി സേവനമനുഷ്ഠിച്ചത്. 1981 മുതൽ 83 വരെ ഹൈക്കോടതിയിൽ അഡ്വക്കറ്റ് ജനറലായി പ്രവർത്തിച്ചു. 1982 -83 കാലഘട്ടത്തിൽ കേരള ബാർ കൗൺസിൽ ചെയർമാനായും സേവനമനുഷ്ഠിച്ചിട്ടുണ്ട്. വിരമിച്ചശേഷം സുപ്രീംകോടതിയിൽ സീനിയർ അഭിഭാഷകനായി തുടർന്നു. സുപ്രീംകോടതിയിലെ കേരളത്തിൻറെ സീനിയർ സ്റ്റാൻഡിങ് കൗൺസലായും പ്രവർത്തിച്ചിരുന്നു. കേരള ഉപലോകായുക്തയായും അദ്ദേഹം സേവനമനുഷ്ഠിച്ചു. 

1927 നവംബർ 19ന് കണ്ണൂർ താഴെ ചൊവ്വ വയക്കര പടന്നക്കോടു വീട്ടിലാണ് ജനനം. ബിരുദ പഠനത്തിനുശേഷം മദ്രാസ് യൂനിവേഴ്‌സിറ്റിയിൽ നിന്ന് ബി എൽ എടുത്തു. 1953ൽ മദ്രാസ് ഹൈകോടതിയിൽ അഭിഭാഷകനായി പ്രാക്ടീസ് ആരംഭിച്ചു. നാല് തവണ കേരള സർവകലാശാലയുടെ സ്റ്റാൻഡിങ് കൗൺസലായും അദ്ദേഹം പ്രവർത്തിച്ചു. സിവിൽ, സർവിസ് നിയമങ്ങളിൽ ഏറെ വൈദഗ്ധ്യമുള്ള അഭിഭാഷകനായിരുന്നു അദ്ദേഹം.