പ്രസവത്തിന് പിന്നാലെ യുവതിയും കുഞ്ഞും മരിച്ചു; ആശുപത്രിക്ക് മുന്നിൽ പ്രതിഷേധം

പാലക്കാട് : പാലക്കാട് പ്രസവത്തിന് പിന്നാലെ യുവതി മരിച്ചു. തത്തമംഗലം സ്വദേശി ഐശ്വര്യ ആണ് മരിച്ചത്. ഇന്നലെ ഐശ്വര്യയുടെ കുഞ്ഞും മരിച്ചിരുന്നു. പാലക്കാടു തങ്കം ആശുപത്രിയിലാണ് സംഭവം. സംഭവത്തിൽ ചികിത്സ പിഴവ് ആരോപിച്ച് ആശുപത്രിയിൽ പ്രതിഷേധം തുടരുകയാണ്. ഐശ്വര്യ മരിച്ചത് അമിത രക്തസ്രാവത്തെ തുടർന്നാണ് എന്നാണ് ആശുപത്രി അധികൃതർ പറഞ്ഞത്. മൃതദേഹം പോസ്റ്റുമോർട്ടത്തിനായി തൃശൂർ മെഡിക്കൽ കോളേജിലേക്ക് കൊണ്ട് പോയി. സംഭവത്തിൽ ബന്ധുക്കളുടെ പരാതിയെ തുടർന്ന് ചികിത്സ പിഴവിന് പോലീസ് കേസെടുത്തു.

ചികിത്സാ പിഴവെന്ന പരാതിയിൽ സ്വകാര്യ ആശുപത്രിക്കെതിരെ കഴിഞ്ഞ ദിവസം കേസെടുത്തിരുന്നു.

പ്രസവത്തിനായി ഐശ്വര്യയെ 29നാണു ആശുപത്രിയിൽ പ്രവേശിപ്പിച്ചത്. ജൂലൈ അഞ്ചോടെയാകും പ്രസവമെന്നും ചിലപ്പോൾ ശസ്ത്രക്രിയ വേണ്ടിവരുമെന്നും ഡോക്ടർമാർ സൂചിപ്പിച്ചിരുന്നതായി ബന്ധുക്കൾ പറഞ്ഞു. തുടർന്നു മുൻകരുതലായാണു യുവതിയെ ആശുപത്രിയിൽ പ്രവേശിപ്പിച്ചത്. കുത്തിവയ്പും നൽകിയിരുന്നു.

യുവതിയുടെ ആരോഗ്യനില പരിഗണിച്ചു ആവശ്യമായ നടപടി സ്വീകരിക്കണമെന്നു ബന്ധുക്കൾ ആവശ്യപ്പെട്ടെങ്കിലും യഥാസമയം അതുണ്ടായില്ലെന്നാണു പരാതി. ഇന്നലെ പുലർച്ചെ യുവതിയെ പ്രസവത്തിനായി കൊണ്ടുപോയെങ്കിലും രണ്ടരയോടെ കു‍ഞ്ഞു മരിച്ചെന്നാണു ഡോക്ടർമാർ അറിയിച്ചത്. ഇന്ന് ഐശ്വര്യയും മരിച്ചു.