മാനസിക രോഗികൾ കഴിക്കുന്ന ഗുളിക വിദ്യാർത്ഥികൾക്ക് വിറ്റു; തലസ്ഥാനത്ത് ലഹരിസംഘം പിടിയിൽ

185 നൈട്രോ സെപാം ഗുളികകളാണ് എക്സൈസ് സ്പെഷ്യൽ സ്‌ക്വാഡ് പിടിച്ചെടുത്തത്. സംഭവവുമായി ബന്ധപ്പെട്ട് അഞ്ച് പേർ പോലീസ് പിടിയിലായി. ഒരു ഗുളികയ്‌ക്ക് അമ്പത് രൂപ ഈടാക്കിയാണ് ഇവർ കുട്ടികൾക്ക് വിൽപന നടത്തിയിരുന്നതെന്ന് പോലീസ് അറിയിച്ചു.

മാനസിക രോഗത്തിന്റെ ചികിത്സയ്‌ക്കായി നൽകുന്ന ഗുളികകളാണ് നൈട്രോ സെപാം. ഇത് സാധാരണക്കാർ കഴിക്കുമ്പോൾ മയക്കം അനുഭവപ്പെടുമെന്നാണ് പറയപ്പെടുന്നത്. എംഡിഎംഎ പോലുള്ള മറ്റ് മയക്കുമരുന്നുകളിലേക്ക് മാറുന്നതിന് ഇത്തരം ഗുളികകളുടെ ഉപഭോഗം കാരണമാകും. കൂടാതെ കുട്ടികൾക്ക് താങ്ങുന്ന വിലയിൽ നൈട്രോ സെപാം ഗുളികകൾ ലഭിക്കുമെന്നതും ആവശ്യക്കാരെ വർധിപ്പിച്ചു.

തിരുവനന്തപുരം ജില്ലയിലെ രണ്ടിടങ്ങളിൽ നിന്നായാണ് ഗുളികകളുമായി ലഹരി സംഘത്തെ പിടികൂടിയത്. തുടർന്ന് ഇവരെ ചോദ്യം ചെയ്തപ്പോഴാണ് വിൽപന രീതിയെക്കുറിച്ച് പ്രതികൾ വിശദമാക്കിയത്. ഒരു സ്ട്രിപ്പിന് 50 രൂപയാണ് യഥാർത്ഥ വില. ഇതിനാണ് ഒന്നിന് 50 രൂപ വെച്ച് ഈടാക്കുന്നത്. സ്‌കൂളുകളുടെ സമീപം ലഹരി മരുന്ന് വിൽക്കാനായി ഉപയോഗിച്ചിരുന്ന ഓട്ടോറിക്ഷയും എക്‌സൈസ് സംഘം പിടികൂടിയിട്ടുണ്ട്. ഇത്തരം ലഹരി മരുന്ന് വിൽക്കുന്ന കൂടുതൽ സംഘങ്ങളുണ്ടോയെന്ന കാര്യവും പോലീസ് പരിശോധിച്ച് വരികയാണ്.