ബിആര്‍എസ്സിന്റെ ശക്തിപ്രകടന റാലി: കേന്ദ്രം ഭരിക്കുന്നത് രാജ്യത്തെ വഞ്ചിച്ചവരെന്ന് മുഖ്യമന്ത്രി പിണറായി വിജയൻ

സമ്മേളനത്തിൽ കേന്ദ്രസർക്കാരിനെതിരെ രൂക്ഷ വിമർശനമുന്നയിച്ച് മുഖ്യമന്ത്രി പിണറായി വിജയൻ. ഫെഡറൽ സംവിധാനത്തെ അട്ടിമറിക്കാൻ ശ്രമിക്കുന്ന സർക്കാരാണ് കേന്ദ്രം ഭരിക്കുന്നതെന്ന് പിണറായി വിജയൻ പറഞ്ഞു. 

ഇന്ത്യ ജനാധിപത്യ മതേതര രാജ്യമാണ്. രാജ്യത്തെ വഞ്ചിച്ച, രാഷ്ട്രപിതാവിനെ വധിച്ചവരാണ് കേന്ദ്രം ഭരിക്കുന്നത്. സംസ്ഥാനങ്ങളുടെ അധികാരത്തിൽ കേന്ദ്രം കൈകടത്താൻ ശ്രമിക്കുകയാണ്. രാജ്യത്തെ ഭിന്നിപ്പിക്കാനുള്ള വർഗീയ അജണ്ടയ്ക്കെതിരെ ജനങ്ങൾ ഒന്നിച്ചു നിൽക്കണമെന്ന് പിണറായി ആഹ്വാനം ചെയ്തു.

നമ്മുടെ സ്വത്വം നമ്മുടെ ഭാഷയാണ്. ഹിന്ദി അടിച്ചേൽപ്പിക്കാനുള്ള ശ്രമം അംഗീകരിക്കാൻ കഴിയില്ല. അത് രാജ്യത്തിന്റെ അഖണ്ഡതയെ തകർക്കും. ജുഡീഷ്യറിയെ കേന്ദ്രം അട്ടിമറിക്കാൻ ശ്രമിക്കുകയാണ്. ബിജെപി സർക്കാരിന്റെ കാലത്ത് ജുഡീഷ്യറിക്ക് പോലും രക്ഷയില്ല. കേന്ദ്രത്തിന്റെ ഒരു പ്രതിനിധിയെ ഉൾപ്പെടുത്താനാണ് നീക്കം. ഇതിനെതിരെ ചീഫ് ജസ്റ്റിസ് നടത്തിയ ഇടപെടൽ പ്രതീക്ഷ നൽകുന്നതാണ്. ആപത്കരമായ ഘട്ടത്തിൽ പ്രതിപക്ഷ ഐക്യം അനിവാര്യമാണെന്ന് മുഖ്യമന്ത്രി പറഞ്ഞു.

ഗവർണർമാരെ ഉപയോഗിച്ച് സംസ്ഥാനങ്ങളുടെ ഭരണം അസ്ഥിരപ്പെടുത്താനുള്ള ശ്രമത്തെക്കുറിച്ചും ഉന്നത വിദ്യാഭ്യാസ മേഖലയിൽ ഇടപെടുന്നതിനെക്കുറിച്ചും പിണറായി തന്റെ പ്രസംഗത്തിൽ പരാമർശിച്ചു. 'ഇത്തവണ ജനങ്ങളുടെ സർക്കാർ' എന്നുള്ളതായിരിക്കണം മുദ്രാവാക്യം എന്ന് ചന്ദ്രശേഖര റാവു റാലിയിൽ പറഞ്ഞു.

ഖമ്മം നഗരത്തിൽ നടക്കുന്ന സമ്മേളനത്തിൽ ഡൽഹി മുഖ്യമന്ത്രി അരവിന്ദ് കെജ്രിവാൾ പഞ്ചാബ് മുഖ്യമന്ത്രി ഭഗവന്ത് മൻ എന്നിവരും പങ്കെടുക്കുന്നുണ്ട്. കൂടാതെ യുപി മുൻ മുഖ്യമന്ത്രി അഖിലേഷ് യാദവും സമ്മേളനത്തിന് എത്തിയിട്ടുണ്ട്. പ്രതിപക്ഷ പാർട്ടികളെ ഒരുമിപ്പിച്ച് മൂന്നാം മുന്നണി രൂപീകരിക്കാനുള്ള ശ്രമത്തിന്റെ ഭാഗമായാണ് സമ്മേളനം. ചന്ദ്രശേഖര റാവു ദേശീയ രാഷ്ട്രീയത്തിലേക്ക് പ്രവേശിക്കുന്നതിന്റെ ഭാഗമായി ടിആർഎസ് ബിആർഎസ് ആയി മാറിയതിനു ശേഷം നടത്തുന്ന ബഹുജന സമ്മേളനമാണ് ഇന്ന് നടക്കുന്നത്.