സിപിഎം സംസ്ഥാന കമ്മിറ്റി അംഗവും യുവജന കമ്മീഷൻ അധ്യക്ഷയുമായ ചിന്താ ജെറോമിനെതിരെ ഗുരുതര ആരോപണവുമായി യൂത്ത് കോൺഗ്രസ് രംഗത്ത്‌. കൊല്ലം തങ്കശ്ശേരിയിലെ ആഡംബര ഹോട്ടലിൽ ഒന്നര വർഷമായി പ്രതിദിനം 8000 രൂപയിലധികം വാടക വരുന്ന അപ്പാർട്ട്മെന്റിൽ ചിന്തയും അമ്മയും താമസിച്ചു വരികയാണെന്നാണ് യൂത്ത് കോൺഗ്രസ് ആരോപിക്കുന്നത്.
വിഷയത്തിൽ അന്വേഷണം ആവിശ്യപ്പെട്ട് വിജിലൻസ് ഡയറക്ടർക്കും, എൻഫോഴ്സ്മെന്റ് ഡയറക്ടർക്കും പരാതി നൽകിയിരിക്കുകയാണ് യൂത്ത് കോൺഗ്രസ്.
ചിന്താ ജെറോമിന്റെ പി എച്ച് ഡി പ്രബന്ധവുമായി ബന്ധപ്പെട്ട വിവാദങ്ങൾ കെട്ടടങ്ങും മുൻപേ അടുത്ത ആരോപണം ഉയർത്തിയിരിക്കുകയാണ് യൂത്ത് കോൺഗ്രസ്.
ഏറെ നിയമ ലംഘനങ്ങൾ നടത്തിയിട്ടുള്ള കൊല്ലത്തെ ഒരു നക്ഷത്ര ഹോട്ടലിൽ ചിന്തയും അമ്മയും ഒരു വർഷത്തിലേറെയായി താമസിക്കുന്നുവെന്നാണ് യൂത്ത് കോൺഗ്രസ് സംസ്ഥാന ജനറൽ സെക്രട്ടറി വിഷ്ണു സുനിൽ പന്തളം ആരോപിക്കുന്നത്.
ഹോട്ടലിലെ നിരക്ക് പ്രകാരം ലക്ഷക്കണക്കിന് രൂപ മാസ വാടക വരുന്ന അപ്പാർട്ട്മെന്റിലാണ് ചിന്ത താമസിക്കുന്നതെന്നും അദ്ദേഹം പറഞ്ഞു.
ഇത്ര വലിയ തുക വാടക നൽകാനുള്ള സാമ്പത്തിക സ്രോതസ്സ് വ്യക്തമാക്കണമെന്നും യൂത്ത് കോൺഗ്രസ് ആവിശ്യപ്പെടുന്നുണ്ട്.
വിഷയത്തിൽ ചിന്തയുടെ ഭാഗത്തു നിന്നും ഇതുവരെ പ്രതികരണമൊന്നുമുണ്ടായിട്ടില്ല.
ഗവേഷണ പ്രബന്ധത്തിലെ ഗുരുതര പിഴവിന്റെ പേരിൽ ചിന്തക്കെതിരെ വലിയ വിമർശനമാണ് കഴിഞ്ഞ ദിവസങ്ങളിൽ പൊതു സമൂഹത്തിൽ നിന്നും ഉയർന്നത്.
ഇപ്പോൾ ഉയർന്നിരിക്കുന്ന ആരോപണം ശെരിയാണെന്ന് അന്വേഷണത്തിൽ തെളിഞ്ഞാൽ വരും ദിവസങ്ങളിൽ അത് കൂടുതൽ വിവാദങ്ങൾക്ക് വഴി വെയ്ക്കാനാണ് സാധ്യത.
0 Comments