'കർഷക ആത്മഹത്യ ഒരു പുതിയ സംഭവമല്ല'; ഇത്തരം സംഭവങ്ങൾ വർഷങ്ങളായി നടക്കുന്നുണ്ടെന്ന് മഹാരാഷ്ട്ര കൃഷി മന്ത്രി

കർഷകർ ആത്മഹത്യ ചെയ്യുന്നത് പുതിയ സംഭവമല്ലായെന്നും വർഷങ്ങളായി ഇത്തരം സംഭവങ്ങൾ നടക്കുന്നുണ്ടെന്നും മഹാരാഷ്ട്ര കൃഷി മന്ത്രി അബ്ദുൾ സത്താർ പറഞ്ഞു. അടുത്തിടെ ഔറംഗബാദ് ജില്ലയിലെ തന്റെ മണ്ഡലമായ സില്ലോഡിൽ കർഷകർ നടത്തിയ ആത്മഹത്യകളെ കുറിച്ച് അഭിപ്രായം തേടിയ മാധ്യമപ്രവർത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.

“കർഷക ആത്മഹത്യ പുതിയ കാര്യമല്ല. വർഷങ്ങളായി ഇത്തരം സംഭവങ്ങൾ നടക്കുന്നുണ്ട്. എന്റെ നിയോജക മണ്ഡലം ഉൾപ്പെടെ മഹാരാഷ്ട്രയിൽ എവിടെയും കർഷക ആത്മഹത്യകൾ ഉണ്ടാകരുതെന്ന് ഞാൻ ആഗ്രഹിക്കുന്നു,” വിമത ശിവസേനാ വിഭാഗത്തിലെ അംഗമായ സത്താർ പറഞ്ഞു.

മാർച്ച് 3 മുതൽ 12 വരെ സിൽഡിൽ രണ്ട് കർഷകരെങ്കിലും ജീവിതം അവസാനിപ്പിച്ചതായി പോലീസ് പറഞ്ഞു. എന്നിരുന്നാലും, ഇതേ കാലയളവിൽ മറാത്ത്‌വാഡ മേഖലയിലെ ഔറംഗബാദ് ജില്ലയിൽ കുറഞ്ഞത് ആറ് കർഷകരെങ്കിലും കടബാധ്യത മൂലം ജീവിതം അവസാനിപ്പിച്ചതായി ആണ് റിപ്പോർട്ട്. ഇതേക്കുറിച്ച് പഠിക്കാൻ കൃഷി കമ്മീഷണറുടെ നേതൃത്വത്തിൽ ഒരു കമ്മിറ്റി രൂപീകരിച്ചിട്ടുണ്ടെന്നും അദ്ദേഹം പറഞ്ഞു.

സംസ്ഥാന സർക്കാർ കർഷകർക്കായി നിരവധി സംരംഭങ്ങൾ സ്വീകരിച്ചിട്ടുണ്ട് എന്നും, ഞങ്ങൾ അവർക്ക് ഒരു രൂപയ്ക്ക് വിള ഇൻഷുറൻസ് നൽകുന്നുവെന്നും അദ്ദേഹം കൂട്ടിച്ചേർത്തു. മാർച്ച് 9 ന് അവതരിപ്പിച്ച ആദ്യ ബജറ്റിൽ, ഏകനാഥ് ഷിൻഡെ-ബിജെപി സർക്കാർ കർഷകർക്ക് 6,000 രൂപ സഹായവും ഒരു രൂപയുടെ വിള ഇൻഷുറൻസ് പദ്ധതിയും നിർദ്ദേശിച്ചിരുന്നു.