ലഹരി ഉപയോഗിച്ച് പല്ല് പൊടിഞ്ഞ നടൻ ആരാണെന്നറിയണോ?; ഇൻബോക്സിൽ ഫോൺ നമ്പർ അയക്കാൻ ആവശ്യപ്പെട്ട് നടൻ ടിനി ടോം

ലഹരി ഉപയോഗിച്ച് പല്ല് പൊടിഞ്ഞ നടൻ ആരാണെന്നറിയണമെങ്കിൽ ഫോൺ നമ്പർ തന്റെ ഇൻബോക്സിൽ അയക്കാൻ ആവശ്യപ്പെട്ട് ടിനി ടോം. തനിക്ക് എതിരെ ഉള്ള സൈബർ അറ്റാക്കിൽ പ്രതിഷേധവുമായി ടിനി ടോം. ലഹരി ഉപയോഗിച്ച് പല്ല് പൊടിഞ്ഞ നടൻ ആരാണെന്നറിയണമെങ്കിൽ നിങ്ങളുടെ ഫോൺ നമ്പർ തന്റെ ഇൻബോക്സിൽ അയക്കാൻ ആവശ്യപ്പെട്ട് നടൻ ടിനി ടോം രംഗത്ത് വന്നു. സിനിമാ മേഖലയിലെ ലഹരി ഉപയോഗത്തെ കുറിച്ച് വെളിപ്പെടുത്തിയതിന് പിന്നാലെ നിരവധിപേരാണ് ടിനി ടോമിനെ സമൂഹമാദ്ധ്യമങ്ങളിലൂടെ മോശം പ്രതികരണവുമായി ആക്രമിച്ചത്. വർദ്ധിച്ചുവരുന്ന ലഹരി ഉപയോഹങ്ങളെ കുറിച്ചും ടിനിയ്ക്കെതിരെ വരുന്ന സൈബർ ആക്രമണത്തെ കുറിച്ചും ഉമ തോമസ് എംഎൽഎ ഫേസ്ബുക്കിൽ പോസ്റ്റിട്ടിരുന്നു. 

ഈ പോസ്റ്റ് ടിനി തന്റെ പേജിൽ ഷെയർ ചെയ്തപ്പോഴും നിരവധിപേരാണ് അതിന് താഴെ പല്ല് ദ്രവിച്ച നടന്റെ പേര് വെളിപ്പെടുത്താൻ ആവശ്യപ്പെട്ട് എത്തിയത്. ഇപ്പോൾ അതിന് മറുപടിയായാണ് ‘നിങ്ങളുടെ നമ്പർ എനിക്ക് ഇൻബോക്സിൽ അയക്കൂ അത് ഞാൻ എക്‌സൈസിന് നൽകാം അവർ നടന്റെ പേര് നിങ്ങൾക്ക് പറഞ്ഞുതരും’ എന്ന് ടിനി കമന്റ് ചെയ്തത്. ടിനിയുടെ മകന് സിനിമയിൽ അവസരം ലഭിച്ചെന്നും എന്നാൽ ലഹരിയോടുള്ള ഭയം മൂലം അതു വേണ്ടെന്നു വച്ചെന്നും ആണ് ടിനി ടോം വെളിപ്പെടുത്തിയത്. കേരള പൊലീസിന്റെ ‘യോദ്ധാവ്’ എന്ന ബോധവൽക്കരണ പരിപാടിയുടെ അംബാസഡർ കൂടിയാണ് ടിനി ടോം.