വിനോദയാത്രയ്ക്കിടെ ബോട്ടിൽനിന്ന്‌ വീണ് യുവാവ് മരിച്ചു!, അപകടം ഇന്ന് വിദേശത്ത് പോകാനിരിക്കെ, മൃതദേഹം കണ്ടെത്തിയത് ഇന്ന് രാവിലെ

ആലപ്പുഴ : വിനോദയാത്രയ്ക്കിടെ ബോട്ടിൽനിന്ന്‌ കാൽവഴുതി ആറ്റിൽ വീണ് യുവാവ് മരിച്ചു. ചങ്ങനാശ്ശേരി തുരുത്തി സ്വദേശി സനീഷാ(41)ണ് മരിച്ചത്. ചൊവ്വാഴ്ച വൈകുന്നേരം നാലരയോടെ ആറായിരം കായലിനു സമീപത്താണ് സംഭവം. മരിച്ച സനീഷ് ഇന്ന് വിദേശത്ത് പോകാനിരിക്കുകയായിരുന്നു.

രാവിലെ 11.30-ഓടെ കാവാലം ജങ്കാർ കടവിനു സമീപത്തുനിന്നാണ് ഏഴംഗസംഘം മോട്ടോർ ബോട്ടിൽ കായലിൽ വിനോദയാത്രയ്ക്കുപോയത്. തിരികെ വരുന്നതിനിടെ സംഭവസ്ഥലത്തെത്തിയപ്പോൾ സനീഷ് കാൽവഴുതി ആറ്റിലേക്കു വീഴുകയായിരുന്നു.

വീഴുന്നതിനിടെ രക്ഷപ്പെടുന്നതിനായി ഒപ്പമുണ്ടായിരുന്നവരെ കയറിപ്പിടിക്കുകയും മൂന്നുപേർ ആറ്റിലേക്കു വീഴുകയുമായിരുന്നു. സമീപത്തെ താമസക്കാർ വള്ളത്തിലെത്തി രണ്ടുപേരെ രക്ഷപ്പെടുത്തി. വിവരമറിഞ്ഞു സ്ഥലത്തെത്തിയ കൈനടി പോലീസും ചങ്ങനാശ്ശേരി അഗ്നിരക്ഷാസേനയും രാത്രി ഏഴരവരെ തിരച്ചിൽ നടത്തിയെങ്കിലും ആളെ കണ്ടെത്താനായില്ല. പിന്നാലെ ഇന്ന് രാവിലെയോടെയാണ് മൃതദേഹം കണ്ടെത്തിയത്.