ഡൽഹിയിലേക്ക് ലോകം...ജി-20 ഉച്ചകോടിക്ക് തുടക്കം!, പ്രധാനമന്ത്രിക്ക് മുന്നിലെ ബോർഡിൽ ഇന്ത്യയ്ക്ക് പകരം ഭാരത്, ഒറ്റക്കെട്ടായി മുന്നോട്ടു പോകണമെന്ന് നരേന്ദ്ര മോദി

ഇന്ത്യ ആതിഥേയത്വം വഹിക്കുന്ന ജി-20 ഉച്ചകോടിക്ക് ഡൽഹി പ്രഗതി മൈതാനിലെ ഭാരത് മണ്ഡപത്തിൽ ഇന്ന് തുടക്കമായി. ലോകരാജ്യങ്ങൾ ഒറ്റക്കെട്ടായി മുന്നോട്ടു പോകണമെന്ന് പ്രധാനമന്ത്രി നരേന്ദ്രമോദി. മോറോക്കോയിലുണ്ടായ ഭൂചലനത്തിൽ മരണപ്പെട്ടവരെ നരേന്ദ്ര മോദി അനുശോചിച്ചു. ജി20യിൽ ആഫ്രിക്കൻ യൂണിയന് സ്ഥിരാംഗത്വം നൽകി. അമേരിക്കൻ പ്രസിഡൻ്റ് ജോ ബൈഡൻ അടക്കമുള്ള ലോകനേതാക്കളാണ് ഉച്ചകോടിയിൽ പങ്കെടുക്കുന്നത്. ആദ്യ സെക്ഷൻ ഒരു ഭൂമി ഒരു കുടുംബം എന്ന സന്ദേശത്തിൽ.

ഉച്ചകോടിക്കായി വിവിധ രാഷ്‌ട്ര തലവന്മാരും നയതന്ത്ര പ്രതിനിധികളും നേരത്തെ തന്നെ ഡൽഹിയിലെത്തിയിരുന്നു. ജി20 അംഗരാജ്യങ്ങളും യുറോപ്പ്യൻ യൂണിയനിലെ പ്രതിനിധികളും ഉച്ചകോടിയിൽ പങ്കെടുക്കും. കൂടാതെ ക്ഷണിക്കപ്പെട്ട അതിഥി രാജ്യങ്ങളിലെയും 30-ലധികം രാഷ്‌ട്രത്തലവന്മാരും ഉന്നത ഉദ്യോഗസ്ഥരും 14 അന്താരാഷ്‌ട്ര സംഘടനാ മേധാവികളും ഉച്ചകോടിയിൽ പങ്കെടുക്കുന്നുണ്ട്.രാവിലെ 10 : 30ന് ആരംഭിക്കുന്ന ഉച്ചകോടിയിൽ വസുധൈവ കുടുംബകം എന്ന ആശയത്തിൽ ഒരുഭൂമി ഒരു കുടുംബം ഒരു ഭാവി എന്നി വിഷയങ്ങളുടെ ഭാഗമായി ആഗാള സാമ്പത്തികാവസ്ഥ, കാലാവസ്ഥാ വ്യതിയാനം, കോവിഡ് ആഘാതം, ഭക്ഷ്യവിതരണശൃംഖല തുടങ്ങിയവ ചര്‍ച്ച ചെയ്യും.

അതേസമയം ഉച്ചകോടിയുടെ പശ്ചാത്തലത്തിൽ ഡൽഹിയിൽ കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്.കേന്ദ്രസർക്കാർ. സർക്കാർ–- സ്വകാര്യ ഓഫീസുകൾ, ബാങ്കുകൾ, മാളുകൾ, മാർക്കറ്റുകൾ, വിദ്യാഭ്യാസ സ്ഥാപനങ്ങൾ, കടകൾ എല്ലാം അടച്ചിട്ടുണ്ട്.ഔദ്യോഗിക വാഹനങ്ങൾക്കും മറ്റ്‌ അവശ്യസർവീസുകൾക്കും മാത്രമാണ്‌ നഗരത്തിലേക്ക്‌ പ്രവേശനം.വഴിയരികിൽ താമസിച്ചിരുന്നവരെയും ഭിക്ഷ തേടുന്നവരെയും നഗരഹൃദയത്തിൽനിന്ന്‌ മാറ്റി. ചേരികൾ പൂർണമായും വലിയ ഷീറ്റുകൊണ്ട്‌ മറച്ച നിലയിലാണ്‌. പ്രധാന വേദിയായ പ്രഗതി മൈതാനത്തിനു സമീപമുള്ള ചേരികളിൽ നിന്ന് ആളുകളെ ഒഴിപ്പിച്ചിരുന്നു.