സ്വർണ്ണ വില വീണ്ടും ഇടിഞ്ഞു!, 3 ദിവസത്തിനിടെ പവന് കുറഞ്ഞത് 280 രൂപ, പ്രതിഫലിക്കുന്നത് ആഗോള വിപണികളിലെ വിലയിടിവെന്ന് വിദഗ്ധർ

സംസ്ഥാനത്ത് രണ്ടാം ദിനവും സ്വർണവില കുറഞ്ഞു. പവന് 80 രൂപ കുറഞ്ഞ് 45,000 രൂപയിലും, ഗ്രാമിന് 10 രൂപ താഴ്ന്ന് 5,625 രൂപയിലുമാണ് ഇന്നു വ്യാപാരം പുരോഗമിക്കുന്നത്. മാസത്തെ ഏറ്റവും താഴ്ന്ന നിലവാരമാണിത്. മൂന്നു ദിവസത്തിനിടെ പവന് 280 രൂപയുടെ കുറവാണ് രേഖപ്പെടുത്തിയത്. 45,120 രൂപയിൽ മാസം തുടങ്ങിയ സ്വർണം ഈ മാസം മൂന്നിന് 45,280 രൂപയിലെത്തിയിരുന്നു. മാസത്തെ ഏറ്റവും ഉയർന്ന നിലവാരം ഇതാണ്. തുടർന്നു സ്വർണവില ഘട്ടംഘട്ടമായി കുറയുകയാണ്.

ആഗോള വിപണികളിലെ വിലയിടിവാണ് നിലവിൽ പ്രാദേശിക വിപണികളിലും പ്രതിഫലിക്കുന്നത്. ആഗോള വിപണിയിൽ സ്വർണം ഔൺസിന് 1,972.75 ഡോളറിലാണു വ്യാപാരം പുരോഗമിക്കുന്നത്. 24 മണിക്കൂറിനിടെ ആഗോള സ്വർണവിലയിൽ 1 ശതമാനത്തിലേറെ കുറവ് രേഖപ്പെടുത്തി. കഴിഞ്ഞ ദിവസങ്ങളിൽ ആഗോള ഓഹരി വിപണികൾ ഇടിഞ്ഞതിനെ തുടർന്ന സ്വർണം കുതിച്ചിരുന്നു. നിലവിൽ ഓഹരി വിപണികൾ തിരിച്ചുകയറുന്നത് സ്വർണത്തിനു ക്ഷീണമായി.

30 ദിവസത്തിനിടെ ആഗോള സ്വർണവിലയിൽ 6.99 ശതമാനം (130.21 ഡോളർ) വർധന രേഖപ്പെടുത്തിയിരുന്നു. ഈ കുതിപ്പുകളിൽ തിരുത്തൽ അനിവാര്യമാണെന്നു വിദഗ്ധരും അഭിപ്രായപ്പെടുന്നു. ആഗോള വിപണികളിലെ വില മാറ്റങ്ങൾ ഡോളറിലാണ്. അതിനാൽ നേരിയ ചലനങ്ങൾ പോലും പ്രാദേശിക വിപണികളിൽ വലിയ ചലനങ്ങൾക്കു വഴിവയ്ക്കും.

എന്നാൽ ആഗോള വിപണികളിലെ ഇടിവിന് അനുസൃതമായ വിലയിടിവ് പ്രാദേശിക വിപണികളിൽ ഉണ്ടായിട്ടില്ലെന്നതാണ് വസ്തുത. ഇതിനു പ്രധാന കാരണങ്ങളിലൊന്ന് ഡോളർ- രൂപ വിനിമയ നിരക്കിലാണ്ടാകുന്ന വ്യതിയാനമാണ്. മറ്റൊന്ന് പ്രാദേശിക വിപണികളിലെ ഉത്സവ വ്യാപാരമാണ്. ദീപാവലി അടുത്തിരികേ സ്വർണവില കൂടുമെന്നു തന്നെയാണ് വിലയിരുത്തൽ.

അതേസമയം സ്വർണവില താഴുന്നത് വ്യാപാരം വർധിപ്പിക്കുമെന്ന ശുഭപ്രതീക്ഷയിലാണ് വ്യാപാരികൾ. പവന് 45,000 രൂപയെന്നതു മികച്ച നിലവാരം തന്നെതാണ്. പണിക്കൂലിയും, നികുതിയും, സെസും എല്ലാം കണക്കാക്കുമ്പോൾ ഒരു പവൻ ആഭരണം വാങ്ങുന്നതിന് 55,000 രൂപയോളം ചെലവ് വരുമെന്നതാണ് യഥാർത്ഥ്യം.

ആഗോള ഓഹരി സൂചികകൾ വീണ്ടും തളർച്ചയുടെ സൂചനകൾ നൽകുന്നതിനാൽ സ്വർണം നിലമെച്ചപ്പെടുത്താൻ സാധ്യതയുണ്ട്. അതേസമയം തിരുത്തൽ അനിവാര്യമാണെന്നു വിദഗ്ധർ പറയുന്നു. സ്വർണം വരും ദിവസങ്ങളിൽ അസ്ഥിരമായേക്കുമെന്നു സാരം. അതിനാൽ നിക്ഷേപകർ ഒന്നു കൂടി കാത്തിരിക്കുന്നതാണ് നല്ലത്. അതേസമയം ആഭരണ പ്രേമികൾ ബുക്കിംഗുകൾ നടത്തുക.

ബുക്കിംഗുകൾ വഴി വില കുതിച്ചാൽ ബുക്കിംഗ് നിരക്കിലും, വില കുറഞ്ഞാൽ വിപണി വിലയിലും സ്വർണം സ്വന്തമാക്കാനാകും. നിക്ഷേപ ആവശ്യങ്ങൾ ഉള്ളവർ ഒരു കാരണവശാലും ആഭരണങ്ങൾ വാങ്ങിക്കൂട്ടാതിരിക്കുക. ഇവർക്ക് മികച്ചത് ഡിജിറ്റൽ ഗോൾഡോ, സ്വർണ ബോണ്ടുകളോ ആണ്. സർക്കാരിന്റെ ഗോൾഡ് ബോണ്ട് പലിശ വരുമാനവും വാഗ്ദാനം ചെയ്യുന്നു.

സംസ്ഥാനത്ത് വെള്ളി വിലയിൽ നിലവിൽ മാറ്റമില്ല. അതേസമയം വരും മണിക്കൂറുകളിൽ വിലയിൽ മാറ്റം പ്രതീക്ഷിക്കാം. നിലവിൽ വെള്ളി ഗ്രാമിന് 78.20 രൂപയാണ്. എട്ട് ഗ്രാം വെള്ളിക്ക് 625.60 രൂപയും, 10 ഗ്രാം വെള്ളിക്ക് 782 രൂപയുമാണ്. വെള്ളി കിലോയ്ക്ക് 78,200 രൂപയാണ്.