ഓട്ടോ ഡ്രൈവറെ ഓട്ടം പോകാൻ വീട്ടിലേക്കു വിളിച്ചു വരുത്തി!, വന്നതോടെ റബർ കത്തി വെച്ച് കുത്തി, പിന്നാലെ ഗൃഹനാഥൻ തൂങ്ങിമരിച്ചു

വീട്ടിലേക്കു വിളിച്ചു വരുത്തി ഓട്ടോ ഡ്രൈവറെ കുത്തിയ ശേഷം ഗ്രഹനാഥൻ ആത്മഹത്യ ചെയ്തു.കോട്ടയം കടുത്തുരുത്തി അറുനൂറ്റിമംഗലത്താണ് സംഭവം. അറുനൂറ്റിമംഗലം സ്വദേശി ഷിബുവാണ് ആത്മഹത്യ ചെയ്തത്. ഓട്ടോ ഡ്രൈവറായ പ്രഭാതിനെ വിളിച്ചുവരുത്തി ഷിബു കുത്തി പരുക്കേൽപ്പിച്ചിരുന്നു. വ്യാഴാഴ്ച രാവിലെ 11 മണിയോടെയാണ് സംഭവം. അറുനൂറ്റിമംഗലം സ്റ്റാൻഡിലെ ഓട്ടോഡ്രൈവറായ കെഎസ്പുരം വടക്കേ കണ്ണംകരയത്ത് വിഎസ് പ്രഭാതിനാണ് കുത്തേറ്റത്. വ്യാഴാഴ്ച രാവിലെ 11 ടാപ്പിംഗ് തൊഴിലാളിയായ ഷിബു പ്രഭാതിനെ ഓട്ടം പോവനായി വീട്ടിലേക്ക് വിളിച്ചു വരുത്തുകയായിരുന്നു.

വീട്ടിലെത്തിയ പ്രഭാതിനെ റബർ കത്തി ഉപയോഗിച്ച് ആക്രമിച്ച ഷിബുവിൽ നിന്നും രക്ഷപ്പെട്ട പ്രഭാത് ഓട്ടോറിക്ഷയുമായി ആശുപത്രിയിലേക്ക് പോയെങ്കിലും അറുനൂറ്റിമംഗലം മലകയറ്റ പള്ളിക്ക് സമീപം നിയന്ത്രണം വിട്ട് റോഡരികിലെ കയ്യാലിക്കും പോസ്റ്റിനും ഇടയിലേക്ക് ഇടിച്ചു കയറി. ഗുരുതരമായി പരിക്കേറ്റ പ്രഭാതിനെ മുട്ടിച്ചിറയിലെ സ്വകാര്യ ആശുപത്രിയിലും പിന്നീട് കോട്ടയം മെഡിക്കൽ കോളേജിലും പ്രവേശിപ്പിച്ചു. പ്രഭാത് വീട്ടിൽ നിന്ന് പോയ ശേഷം ഷിബു വീടിനകത്ത് കയറി തൂങ്ങി മരിക്കുകയായിരുന്നു. രണ്ടാഴ്ച മുൻപ് ഷിബുവിന്റെ പിതാവ് മരണമടഞ്ഞിരുന്നു. ഈ സംസ്കാര ചടങ്ങിൽ എത്തിയ ഷിബുവിന്റെ ഭാര്യ ഷീബ വെള്ളിയാഴ്ച വിദേശത്തേക്ക് മടങ്ങി പോകാനിരിക്കെയാണ് ദുരന്തം.