കാത്തിരിപ്പിന് പ്രതീക്ഷയറ്റു!, ഭാര്യയുമായി പോകവേ ബൈക്കപകടത്തില്‍ ഗുരുതരമായി പരിക്കേറ്റു, തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്ന യുവാവ് മരിച്ചു

തിരുവല്ലത്തുണ്ടായ ബൈക്കപകടത്തില്‍ ഗുരുതരമായി പരിക്കേറ്റ് തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്ന യുവാവ് മരിച്ചു. വെങ്ങാനൂര്‍ മുട്ടയ്ക്കാട് സ്വാതി ഭവനില്‍ കുമാര്‍ (40) ആണ് മരിച്ചത്. കഴിഞ്ഞ ബുധനാഴ്ച വൈകുന്നേരം 5.30 ഓടെയായിരുന്നു അപകടം നടന്നത്. നഗരത്തില്‍ ഡോക്ടറെ കാണാനായി ഭാര്യ സരിതയുമായി ബൈക്കില്‍ പോകവെ തിരുവല്ലം ജംഗ്ഷനില്‍ വെച്ച് എതിര്‍ ദിശയില്‍ നിന്നെത്തിയ യുവാവ് സഞ്ചരിച്ച ബൈക്ക് കുമാറിന്റെ ബൈക്കില്‍ വന്നിടിക്കുകയായിരുന്നു. ഇടിയുടെ ആഘാതത്തില്‍ റോഡിലേക്ക് തെറിച്ചു വീണാണ് കുമാറിന് ഗുരുതര പരിക്കേറ്റത്. ബൈക്കില്‍ നിന്നും തെറിച്ചു വീണ കുമാറിന്റെ ഹെല്‍മറ്റ് റോഡില്‍ ചിതറി തെറിച്ച നിലയിലായിരുന്നു. 

സരിതയുടെ ഇടത് കൈക്കും കാലിനും ഗുരുതര പരിക്കേറ്റു. ഇരുവരെയും തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും കുമാര്‍ ഇന്നലെ പുലര്‍ച്ചെ ചികിത്സയിലിരിക്കെ മരണത്തിന് കീഴടങ്ങി. മൃതദ്ദേഹം പോസ്റ്റുമോര്‍ട്ടത്തിന് ശേഷം ഭാര്യ വീടായ വെള്ളാര്‍ നെല്ലിവിള നടുത്തട്ട് പുത്തന്‍വീട്ടില്‍ സംസ്‌കരിച്ചു. നേഴ്‌സിങ് വിദ്യാര്‍ത്ഥിനിയായ സ്വാതി, മണക്കാട് കാര്‍ത്തിക തിരുനാള്‍ എച്ച്.എസ്.എസിലെ പ്ലസ് വണ്‍ വിദ്യാര്‍ത്ഥിനിയായ ദേവു എന്നിവര്‍ മക്കളാണ്. കോവളത്തെ സ്വകാര്യ ഹോട്ടലുകള്‍ക്ക് വെള്ളം സപ്ലൈ ചെയ്യുന്ന ബി.എസ്. കെ മോട്ടേഴ്‌സിന്റെ െ്രെഡവറായിരുന്നു യുവാവ്.