നിയമ വിദ്യാർഥിനിയെ മർദ്ദിച്ച കേസ്!, ഡിവൈഎഫ്ഐ പ്രവർത്തകൻ പോലീസിന് മുന്നിൽ കീഴടങ്ങി

പത്തനംതിട്ട : നിയമ വിദ്യാർത്ഥിനിയെ മർദ്ദിച്ച സംഭവത്തിൽ ഡിവൈഎഫ്ഐ നേതാവ് ജയ്സൺ ജോസഫ് പോലീസിൽ കീഴടങ്ങി. മൗണ്ട് സിയോൺ ലോ കോളേജിലെ വിദ്യാർത്ഥിനിയെ മർദ്ദിച്ച കേസിൽ പത്തനംതിട്ട ഡിവൈഎസ്പി ഓഫീസിലെത്തിയാണ് കീഴടങ്ങിയത്.

പെുരനാട് ബ്ലോക്ക് സെക്രട്ടറിയും സിപിഎം ഏരിയ കമ്മിറ്റി അം​ഗവുമാണ് ജെയ്സൺ. വിദ്യാർത്ഥിനിയെ പ്രതി മർദ്ദിച്ചെന്ന പരാതിയിൽ പോലീസ് ആദ്യം കേസെടുത്തിരുന്നില്ല. മർദ്ദനമേറ്റയാളുടെ പരാതിയിൽ കേസെടുക്കാൻ മടിച്ച പോലീസ്, പരാതിക്കാരിക്കെതിരെ തുടരെ കേസ് എടുത്തിരുന്നു. പിന്നീട് വിദ്യാർത്ഥികൾ നടത്തിയ പ്രതിഷേധത്തിനൊടുവിലാണ് ഇയാളെ അറസ്റ്റ് ചെയ്തത്.

ഡിസംബർ 20-നാണ് നിയമ വിദ്യാർത്ഥിനിക്ക് മർദ്ദനമേറ്റത്. ജനുവരി ഒൻപതിന് ജെയ്സണിൻ‌റെ മുൻകൂർ ജാമ്യാപേക്ഷ ഹൈക്കോടതി തള്ളിയിരുന്നു. ഹർജി തള്ളിയിട്ടും ജെയ്സണെ അറസ്റ്റ് ചെയ്യാതിരുന്നത് വലിയ വിമർശനങ്ങൾക്ക് വഴിവച്ചിരുന്നു. ഇതിനിടെയാണ് പ്രതി ഇപ്പോൾ കീഴടങ്ങിയത്.