കണ്ണീരായി വയനാട്...!, ദുരന്തം നടന്ന് 11 മണിക്കൂർ പിന്നിടുമ്പോഴും സഹായം ആവശ്യപ്പെടുന്നവരിലേക്ക് എത്താനാവാതെ രക്ഷാപ്രവർത്തകർ, നൂറിലധികം ആളുകൾ പല സ്ഥലങ്ങളിലായി കുടുങ്ങി കിടക്കുന്നു, മരണം സംഖ്യ 50 ആയി ഉയർന്നു

വയനാട് മേപ്പാടി മുണ്ടക്കൈയില്‍ ഉണ്ടായ വന്‍ ഉരുള്‍ പൊട്ടലില്‍ 50 മരണം സ്ഥിരീകരിച്ചു. ഈ വാർത്ത അപ്ഡേറ്റു ചെയ്യുന്ന 12.10 PMലെ കണക്കാണ് ഇത്. വട്ടമല ,ചുരൽമല മുണ്ടക്കൈ എന്നിവിടങ്ങളിൽ ദുരന്തത്തിൽപെട്ടവരിലേക്ക് എത്തിപെടാൻ പോലും രക്ഷാപ്രവർത്തകർക്ക് ഇതുവരെ കഴിഞ്ഞിട്ടില്ല. നിരവധി വീടുകൾ ഇപ്പോഴും മണ്ണിനടയിലാണ്. ചാലിയാർ പുഴയിൽ നിന്ന് 13 പേരുടെ മൃതദേഹങ്ങൾ കണ്ടെത്തി. ഈ മൃതദേഹങ്ങൾ നിലമ്പൂർ താലൂക്ക് ആശുപത്രിയിലേക്ക് മാറ്റി.

24 മൃതദേഹങ്ങള്‍ മേപ്പാടിയിലെ സർക്കാർ ആശുപത്രികളിലും സ്വകാര്യ ആശുപത്രികളിലുമുണ്ടെന്ന് ആരോഗ്യമന്ത്രി അറിയിച്ചു. എഴുപതോളം പേരാണ് ചികിത്സയില്‍ കഴിയുന്നത്. അട്ടമലയിൽനിന്ന് ആറു മൃതദേഹങ്ങൾ കണ്ടെടുത്തു. ചുരൽമല പുഴയിൽനിന്നും മൃതദേഹങ്ങൾ കണ്ടെടുക്കുകയാണ്. മരണ സംഖ്യ കൂടിയേക്കുമെന്ന് ആശങ്ക നാട്ടുകാർ പ്രകടിപ്പിച്ചു. പോത്തുകല്ലിൽ ചാലിയാറിൽനിന്ന് മൃതദേഹങ്ങൾ കണ്ടെടുത്തതായാണ് നാട്ടുകാർ പറയുന്നു. ഇപ്പോഴും ദുരന്തത്തിൻ്റെ വ്യാപ്തി മനസ്സിലാക്കാൻ നാട്ടുകാർക്ക് സാധിക്കുന്നില്ല. തകർന്ന വീടുകളിൽനിന്നും കെട്ടിടങ്ങളിൽനിന്നും മൃതദേഹങ്ങളും കണ്ടെടുക്കുകയാണ്.

തകർന്ന വീട്ടിൽനിന്ന് ഗുരുതരമായി പരുക്കേറ്റ കുട്ടിയെ രക്ഷപ്പെട്ടു. മുണ്ടക്കൈ ഭാഗത്തേക്ക് കൂടുതൽ രക്ഷാ പ്രവർത്തകർ പോകാനായി ശ്രമിക്കുന്നുണ്ടെങ്കിലും പൂർണമായി കഴിഞ്ഞിട്ടില്ല. മലവെള്ള പാച്ചിലില്‍ നിരവധി വീടുകള്‍ ഒലിച്ചു പോയിട്ടുണ്ട്. രക്ഷാപ്രവര്‍ത്തനം തുടരുകയാണ്. മരണസംഖ്യ ഉയരുമോ എന്ന ആശങ്ക നിലനില്‍ക്കുന്നു. രക്ഷാ പ്രവർത്തനത്തിന് വായുസേനയുടെ ഹെലികോപ്റ്ററുകൾ എത്തുന്നുണ്ട്. വയനാടേക്ക് ഹെലികോപ്റ്ററിന് എത്താനാകാത്തതിനാല്‍ കോഴിക്കോട് ഇറക്കേണ്ടതായി വന്നു.

നാല് ആശുപത്രകളിലായാണ് മൃതദേഹങ്ങൾ സൂക്ഷിച്ചിട്ടുള്ളത്. ഉരുള്‍ പൊട്ടലും മലവെള്ളപാച്ചിലും 400 ലധികം കുടുംബങ്ങളെയാണ് ബാധിച്ചതെന്നാണ് പ്രാഥമിക നിഗമനം. വെള്ളാര്‍മല സ്‌കൂള്‍ പൂര്‍ണമായും വെള്ളത്തിനടയിലായി. സമീപകാലത്തൊന്നും കാണാത്ത തരത്തിലുള്ള ദുരന്തമാണ് വയനാട് ഉണ്ടായത്. രക്ഷാ പ്രവര്‍ത്തനം തുടരുകയാണ്. മന്ത്രിമാരായ കെ രാജന്‍, ഒ ആര്‍ കേളു എന്നിവര്‍ വയനാട്ടിലേക്ക് തിരിച്ചിട്ടുണ്ട്.

ഫയർ ആൻഡ് റസ്ക്യൂ, സിവിൽ ഡിഫൻസ്, എൻഡിആർഎഫ്, ലോക്കൽ എമർജൻസി റെസ്പോൺസ് ടീം എന്നിവരുടെ 250 അംഗങ്ങൾ വയനാട് ചൂരൽമലയിൽ രക്ഷാപ്രവർത്തനത്തിൽ ഏർപ്പെട്ടിട്ടുണ്ട്. എൻഡിആർഎഫിന്റെ കൂടുതൽ ടീമിനെ സംഭവസ്ഥലത്തേക്ക് ഉടൻ എത്തിക്കുന്നതിന് നിർദ്ദേശം നൽകിയിട്ടുണ്ടെന്ന് മുഖ്യമന്ത്രി പിണറായി വിജയൻ അറിയിച്ചു.