അശ്ലീല വീഡിയോ കണ്ട് 9 വയസുകാരിയെ സഹോദരൻ പീഡിപ്പിച്ച് കൊലപ്പെടുത്തി...!, 13-കാരനെ രക്ഷിക്കാൻ ശ്രമിച്ച അമ്മയെയും രണ്ട് സഹോദരിമാരെയും പ്രതിചേർത്ത് പൊലീസ്, സംശയത്തെ തുടർന്ന് ചോദ്യം ചെയ്തതോടെ പുറത്ത് വന്നത് ഞെട്ടിക്കുന്ന ക്രൂരത

മൊബൈൽ ഫോണിൽ അശ്ലീല വീഡിയോ കണ്ടതിന് ശേഷം സഹോദരിയെ പീഡിപ്പിച്ചു കൊലപ്പെടുത്തിയ സഹോദരൻ പിടിയിൽ. മധ്യപ്രദേശിലെ രേവ ജില്ലയിലാണ് 9 വയസ്സുകാരിയെ പീഡിപ്പിച്ച് കൊലപ്പെടുത്തിയ 13 കാരൻ പൊലീസ് പിടിയിലായത്. കുറ്റകൃത്യം മൂടിവയ്ക്കാൻ പ്രതിയെ സഹായിച്ച അമ്മയെയും രണ്ട് സഹോദരിമാരെയും പൊലീസ് പ്രതിചേർത്തു. സംഭവത്തിന് ശേഷം കൗമാരക്കാരന്റെ അമ്മയും 17 ഉം 18 ഉം വയസ്സുള്ള സഹോദരിമാരും ചേർന്ന് മൃതദേഹം സംഭവം നടന്ന മുറിയിൽ നിന്ന് മാറ്റുകയായിരുന്നുവെന്ന്  മധ്യപ്രദേശ് പൊലീസ് ഉദ്യോഗസ്ഥൻ പറഞ്ഞു.

ഏപ്രിൽ 24 ന് മധ്യപ്രദേശിലെ രേവ ജില്ലയിലെ ഒരു വീടിന്‍റെ മുറ്റത്ത് ഒരു പെൺകുട്ടിയുടെ മൃതദേഹം കിടക്കുന്നതായി മധ്യപ്രദേശ് പൊലീസിന് വിവരം ലഭിച്ചു. പോസ്റ്റ്‌മോർട്ടം റിപ്പോർട്ടിൽ പെൺകുട്ടി ലൈംഗിക പീഡനത്തിന് ഇരയായിരിക്കുന്നു എന്ന് വ്യക്തമായതിനെ തുടർന്നാണ് പൊലീസ് കേസ് രജിസ്റ്റർ ചെയ്തു അന്വേഷണം ആരംഭിച്ചത്.

സംഭവത്തിൽ സംശയം തോന്നിയ പൊലീസ് വീട്ടുകാരെ വിശദമായി ചോദ്യം ചെയ്തപ്പോഴാണ് കുറ്റകൃത്യം പുറത്തറിഞ്ഞത്. മൊബൈൽ ഫോണിൽ അശ്ലീല വീഡിയോ കണ്ടതിനു ശേഷം 13 വയസ്സുള്ള സഹോദരൻ രാത്രിയിൽ  പെൺകുട്ടിയുടെ അരികിൽ വന്ന് കിടക്കുകയും തുടർന്ന് അവളെ ലൈംഗികമായി ഉപദ്രവിക്കുകയുമായിരുന്നുവെന്ന് പൊലീസ് പറഞ്ഞു. സംഭവം പിതാവിനോട് പറയുമെന്ന് പെൺകുട്ടി ഭീഷണിപ്പെടുത്തിയപ്പോൾ 13 കാരൻ കഴുത്ത് ഞെരിക്കുകയായിരുന്നു. പിന്നീട് അമ്മയെ ഉണർത്തുകയും അമ്മയോട് സംഭവം തുറന്നുപറയുകയും ചെയ്തു. അപ്പോഴും പെൺകുട്ടിക്ക് ജീവനുണ്ടെന്ന് കണ്ടെത്തിയതോടെ പ്രതി വീണ്ടും കഴുത്ത് ഞെരിച്ച് മരണം ഉറപ്പാക്കിയെന്ന് പൊലീസ് അന്വേഷണത്തിൽ തെളിഞ്ഞു.

സംഭവത്തിന് ശേഷം പ്രതിയുടെ മറ്റ് രണ്ട് സഹോദരിമാരും ഉണർന്ന് അന്വേഷണം വഴിതെറ്റിക്കാൻ കിടക്കയുടെ സ്ഥലം മാറ്റിയതായും അന്വേഷണത്തിൽ കണ്ടെത്തി. പെൺകുട്ടി വിഷപ്രാണിയുടെ കടിയേറ്റാണ് മരിച്ചതെന്ന് വീട്ടുകാർ പൊലീസിനോട് കള്ളം പറഞ്ഞു. സാങ്കേതിക തെളിവുകൾ ശേഖരിച്ച് 50ഓളം പേരെ ചോദ്യം ചെയ്തതിന് ശേഷമാണ് പൊലീസിന് വ്യക്തമായ സംഭവത്തെക്കുറിച്ച് സൂചന ലഭിക്കുന്നത്. കുടുംബാംഗങ്ങളുടെ മൊഴികളിലെ വൈരുദ്ധ്യവും പൊലീസിന്റെ ശ്രദ്ധയിൽപ്പെട്ടു. തുടർന്ന് നടത്തിയ വിശദമായ ചോദ്യം ചെയ്യലാണ് പ്രതികൾ കുറ്റം സമ്മതിച്ചതെന്ന് രേവ എസ്പി പറഞ്ഞു.