ദുരിതക്കയത്തിൽ വീണ കേരളത്തിന് രക്ഷാകരം നീട്ടി തമിഴ്‌നാട്...!, വയനാടിന് അഞ്ച് കോടിയുടെ ധനസഹായം അനുവദിച്ച് മുഖ്യമന്ത്രി എം.കെ.സ്റ്റാലിന്‍

ചൂരല്‍മല ഉരുള്‍പൊട്ടലിൽ കേരളത്തിന് എല്ലാവിധ പിന്തുണയും വാഗ്ദാനം ചെയ്ത് തമിഴ്‌നാട് സർക്കാർ. വയനാട് ചൂരൽമലയിലുണ്ടായ ഉരുൾപ്പൊട്ടലിൽ നിരവധി പേർ മരിച്ചതിന് പിന്നാലെ തമിഴ്നാട് മുഖ്യമന്ത്രി എം.കെ. സ്റ്റാലിൻ അനുശോചനമറിയിച്ചു. ഇതോടൊപ്പം വയനാടിന് അഞ്ച് കോടി ധനസഹായവും സ്റ്റാലിന്‍ അനുവദിച്ചു.

ഇപ്പോഴും നിരവധി പേ‍ർ ദുരന്ത മേഖലയിൽ കുടുങ്ങിക്കിടക്കുന്നുണ്ടെന്ന് മനസിലാക്കുന്നുവെന്നും, കേരളത്തിലെ മികച്ച രക്ഷാപ്രവ‍ർത്തനത്തിലൂടെ എല്ലാവരെയും രക്ഷിക്കാൻ സാധിക്കുമെന്ന് വിശ്വസിക്കുന്നുവെന്നും എം.കെ. സ്റ്റാലിൻ പറഞ്ഞു. ഈ വിഷമകരമായ സാഹചര്യത്തിൽ അയൽസംസ്ഥാനത്തിന് വേണ്ട ഏതു പിന്തുണയും നൽകാൻ തയ്യാറാണെന്നും സ്റ്റാലിൻ എക്സ് പോസ്റ്റിൽ കുറിച്ചു.

വയനാട് മുണ്ടക്കൈ ചൂരല്‍മലയിലെ ഉരുൾപൊട്ടലിൽ 70 മരണം ഇതുവരെ സ്ഥിരീകരിച്ചു. ഇന്ന് പുലർച്ചെ മൂന്ന് തവണയാണ് ചൂരൽമലയിൽ ഉരുൾപൊട്ടലുണ്ടായത്. പുലര്‍ച്ചെ രണ്ട് മണിയോടെയായിരുന്നു ആദ്യ ഉരുൾപൊട്ടൽ. 4.10 ഓടെ വീണ്ടും അതിശക്തമായ ഉരുള്‍പൊട്ടലുണ്ടായി. വൈത്തിരി താലൂക്ക്, വെള്ളേരിമല വില്ലേജ്, മേപ്പാടി പഞ്ചായത്തിലായിട്ടാണ് ഉരുള്‍പൊട്ടിയത്. നിലവിൽ 70ഓളം പേർ ചികിത്സയിലുണ്ട്.