വിദ്യാര്‍ഥികളെ താമസിപ്പിച്ച് നടത്തിയ അഞ്ചുദിവസത്തെ എന്‍.സി.സി. ക്യാമ്പിൽ പീഡനം...!, പീഡനത്തിനിരയായത് പതിനാല് സ്‌കൂൾ വിദ്യാർഥിനികൾ, ട്രെയിൻ ഉൾപ്പെടെ 11 പേർ അറസ്റ്റിൽ

ചെന്നൈ : തമിഴ്‌നാട് കൃഷ്ണഗിരി ജില്ലയില്‍ വ്യാജ ക്യാമ്പ് സംഘടിപ്പിച്ച് പെണ്‍കുട്ടികള്‍ക്കുനേരെ ലൈംഗീകതിക്രമം നടന്ന സംഭവത്തിൽ പാര്‍ട്ട് ടൈം എന്‍.സി.സി. ട്രെയിനറും നാം തമിഴര്‍ കക്ഷി നേതാവുമായ ശിവരാമനടക്കം 11 പേരെ പൊലീസ് അറസ്റ്റു ചെയ്തു. 14 സ്‌കൂള്‍വിദ്യാര്‍ഥിനികളാണ് പീഡനത്തിന് ഇരയായത്.

ഹയര്‍ സെക്കന്‍ഡറി സ്‌കൂളില്‍ വിദ്യാര്‍ഥികളെ താമസിപ്പിച്ച് നടത്തിയ അഞ്ചുദിവസത്തെ എന്‍.സി.സി. ക്യാമ്പിലാണ് പീഡനമുണ്ടായത്. എന്നാല്‍, ഈ ക്യാമ്പ് എന്‍.സി.സി. അധികൃതരുടെ അറിവോടെയല്ലെന്ന് പൊലീസ് പറഞ്ഞു. എന്‍.സി.സി. ട്രെയിനര്‍ ശിവരാമന്‍, സ്‌കൂള്‍ ചെയര്‍മാന്‍, സ്‌കൂള്‍ കറസ്പോണ്ടന്റ് എന്നിവരുള്‍പ്പെടെ 11 പേരാണ് അറസ്റ്റിലായിട്ടുള്ളതെന്ന് പൊലീസ് തിങ്കളാഴ്ച അറിയിച്ചു.

സ്വകാര്യ സ്കൂളിന് എൻസിസി യൂണിറ്റുണ്ടായിരുന്നില്ല. എന്നാല്‍ ക്യാമ്പ് സംഘടിപ്പിക്കുകയാണെങ്കില്‍ എൻസിസി യൂണിറ്റ് ആരംഭിക്കാൻ യോഗ്യത ലഭിക്കുമെന്ന് ചൂണ്ടിക്കാണിച്ച് ഒരു സംഘം സ്കൂള്‍ മാനേജ്മെന്റിനെ സമീപിക്കുകയായിരുന്നു. സംഘത്തെക്കുറിച്ച് അന്വേഷിക്കുന്നതില്‍ സ്കൂള്‍ മാനേജ്മെന്റ് പരാജയപ്പെടുകയായിരുന്നു.

ഒരു വിദ്യാര്‍ഥിനിയുടെ മാതാപിതാക്കള്‍ നല്‍കിയ പരാതിയെത്തുടര്‍ന്ന് പൊലീസ് നടത്തിയ അന്വേഷണത്തിലാണ് ഇവര്‍ അറസ്റ്റിലായത്. എന്‍.സി.സി. ട്രെയിനര്‍ തിങ്കളാഴ്ച പൊലീസിന് നല്‍കിയ മൊഴിയിലും 14 വിദ്യാര്‍ഥിനികളെ പീഡിപ്പിച്ചതായി വെളിപ്പെടുത്തിയിരുന്നു. കടുത്ത വയറുവേദനയും ശരീരത്തില്‍ പരിക്കുകളുമേറ്റിരുന്ന വിദ്യാര്‍ഥിനി വിവരം മാതാപിതാക്കളോടും പറഞ്ഞു. ഉടനെ രക്ഷിതാക്കളാണ് പൊലീസില്‍ പരാതി നല്‍കിയത്. തുടര്‍ന്ന് നടന്ന അന്വേഷണത്തിലാണ് 11 പേരും അറസ്റ്റിലായത്.