സോഷ്യൽ മീഡിയയിലൂടെ പരിചയപ്പെട്ട 16കാരിയെ ലൈംഗികമായി ദുരുപയോഗം ചെയ്യാൻ ശ്രമം...!, പോക്‌സോ കേസില്‍ യൂട്യൂബർ വിജെ മച്ചാന്‍ പോലീസ് പിടിയിൽ, നടപടി പെണ്‍കുട്ടി പൊലീസ് സ്റ്റേഷനില്‍ നേരിട്ടെത്തി നല്‍കിയ പരാതിയിൽ

ആലപ്പുഴ : പോക്സോ കേസില്‍ യൂ ടൂബര്‍ വി ജെ മച്ചാന്‍ അറസ്റ്റില്‍. 16 വയസുകാരിയുടെ പരാതിയിലാണ് പൊലീസ് ഇയാളെ അറസ്റ്റ് ചെയ്തത്. സോഷ്യല്‍ മീഡിയയിലൂടെ പരിചയപ്പെട്ട ശേഷം തന്നെ ലൈംഗികമായി ദുരുപയോഗം ചെയ്യാന്‍ ശ്രമിച്ചെന്ന് ചൂണ്ടിക്കാട്ടിയാണ് പെണ്‍കുട്ടി പരാതി നല്‍കിയത്. ഇതോടെ പോക്‌സോ കേസ് രജിസ്റ്റര്‍ ചെയ്ത പോലീസ് നടപടികളിലേക്ക് കടക്കുകയായിരുന്നു.

ഇന്ന് പുലര്‍ച്ചെ കളമശ്ശേരി പൊലീസാണ് കൊച്ചിയിലെ ഫ്ളാറ്റില്‍ നിന്ന് ഇയാളെ അറസ്റ്റ് ചെയ്തത്. 16 വയസുകാരിയായ പെണ്‍കുട്ടി കളമശ്ശേരി പൊലീസ് സ്റ്റേഷനില്‍ നേരിട്ടെത്തി നല്‍കിയ പരാതിയുടെ അടിസ്ഥാനത്തിലാണ് അറസ്റ്റ്. പൊലീസ് ഗോവിന്ദിനെ വിശദമായി ചോദ്യം ചെയ്ത് വരികയാണ്. ഇയാളുടെ മൊബൈല്‍ ഫോണുകളും മറ്റ് ഇലക്ട്രോണിക് വസ്തുക്കളും പൊലീസ് വിശദമായി പരിശോധിക്കുന്നുമുണ്ട്.

ഗോവിന്ദ് ആലപ്പുഴ മാന്നാര്‍ സ്വദേശിയാണ്. സോഷ്യല്‍ മീഡിയ പ്ലാറ്റ്ഫോമുകളില്‍ രണ്ടര ലക്ഷത്തിലേറെ ഫോളോവേഴ്സാണ് ഇയാള്‍ക്കുള്ളത്. നിലവില്‍ വി ജെ മച്ചാനെ പൊലീസ് ചോദ്യം ചെയ്തു വരികയാണ്. അതിന് ശേഷം തുടര്‍ നടപടികള്‍ സ്വീകരിക്കും. സൈബറിടത്തില്‍ വ്യത്യസ്തമായ വീഡിയോകള്‍ ചെയ്ത് ശ്രദ്ധേയനാണ് വി ജെ മച്ചാന്‍. അടുത്തകാലത്തായി സെലിബ്രിറ്റി സ്റ്റാറ്റസോടെ ചില പരിപാടികളിലും പങ്കെടുത്തിരുന്നു.