കൊല്ലം എം.എൽ.എയും നടനുമായ എം.മുകേഷ് നിയമസഭാംഗത്വം രാജിവെച്ചേക്കും?...!, പാർട്ടിയെ പ്രതിരോധത്തിലാക്കാൻ നിൽക്കരുതെന്ന് ജില്ലാ നേതൃത്വത്തിൻ്റെ വിമർശനം

കൊല്ലം : കൊല്ലം മണ്ഡലം എം.എൽ.എയും നടനുമായ എം.മുകേഷ് നിയമസഭാംഗത്വം രാജിവെയ്ക്കുമെന്ന് സൂചന. ഇത് സംബന്ധിച്ച് ജില്ലയിലെ മുതിർന്ന നേതാക്കൾക്കിടയിൽ ആശയക്കുഴപ്പമുണ്ടെന്നാണ് ലഭ്യമായ വിവരങ്ങൾ സൂചിപ്പിക്കുന്നത്. മുകേഷ് രാജി വയ്ക്കേണ്ടതില്ല എന്ന് സിപിഎം തീരുമാനമെടുത്തതായ വാർത്തകൾ അവാസ്തവമാണെന്ന് പാർട്ടി വൃത്തങ്ങൾ അഷ്ടമുടി ലൈവിനോട് വ്യക്തമാക്കി. പാർട്ടി തീരുമാനം ഔദ്യോഗികമായി നിങ്ങളെ അറിയിക്കുമെന്നുമാണ് ജില്ലാ നേതൃത്വത്തിന്റെ നിലപാട്. ലൈം​ഗികാരോപണം നേരിടുന്ന എംഎൽഎ മുകേഷിന്റെ രാജിയാവശ്യപ്പെട്ട് പ്രതിപക്ഷ സംഘടനകൾ സംസ്ഥാന വ്യാപക പ്രതിഷേധത്തിനൊരുങ്ങിയത് പാർട്ടിയെ പ്രതിരോധത്തിൽ ആക്കുമെന്ന കീഴ്ഘടകങ്ങളുടെ മുന്നറിയിപ്പിനെ തുടർന്നാണ് ജില്ലാ നേതൃത്വത്തിൽ ഇത്തരത്തിൽ ഒരു ചർച്ച മുന്നോട്ട് വരുന്നത്. മുകേഷിന്റെ രാജി പാർട്ടിയെ കൂടുതൽ പ്രതിരോധത്തിൽ ആക്കുകയേ ഉള്ളൂ എന്നാണ് മറ്റൊരു വിഭാഗത്തിന്റെ വിമർശനം. ഇത് സംബന്ധിച്ചാണ് ആശയക്കുഴപ്പം നിലനിൽക്കുന്നത്.

എന്നാൽ മുകേഷ് ആരോപണങ്ങളെ തള്ളിക്കൊണ്ട് രാജിവെക്കാൻ തയ്യാറായില്ലെങ്കിൽ ആരോപണങ്ങളെ പ്രതിരോധിക്കാനും നേരത്തെ സംസ്ഥാന നേതൃത്വത്തിൽ അപ്രഖ്യാപിത തീരുമാനം ഉണ്ടായിരുന്നു. എന്നാൽ ഇതിനെ ജില്ലയിലെ മുതിർന്ന നേതാക്കൾ എതിർക്കുന്നതായാണ് പുറത്തുവരുന്ന റിപ്പോർട്ടുകൾ. കൊല്ലം മണ്ഡലത്തിലെ സ്ഥാനാർത്ഥി എന്ന നിലയിൽ എം.മുകേഷിന്റെ പ്രവർത്തനം മോശമായിരുന്നുവെന്നും പാർട്ടി തീരുമാനിച്ചതുപോലെ പ്രവർത്തനം മുന്നോട്ട് പോയില്ലെന്നും ജില്ലാ സെക്രട്ടറിയേറ്റിൽ നേരത്തെ തന്നെ വിമർശനം ഉയർന്നിരുന്നു. അതേ സമയം, മുകേഷിനെതിരെ പ്രതിപക്ഷ യുവജന സംഘടനകളുടെ നേതൃത്വത്തിൽ ഇന്നും പ്രതിഷേധം ശക്തമാക്കാനാണ് തീരുമാനം. മുകേഷിന്റെ കൊല്ലത്തെ വീട്ടിലേക്കും എംഎൽഎയുടെ ഓഫീസിലേക്കും പ്രതിഷേധ മാർച്ച് സംഘടിപ്പിക്കും. ഇരയ്ക്കൊപ്പമെന്ന വാദം സർക്കാർ ആവർത്തിക്കുന്നുണ്ടെങ്കിലും പാർട്ടി എംഎൽഎക്കെതിരെ ആരോപണം വന്നപ്പോൾ വേട്ടക്കാരനൊപ്പം നിൽക്കുന്ന നിലപാടാണ് സർക്കാർ സ്വീകരിക്കുന്നതെന്നാണ് പ്രതിപക്ഷത്തിന്റെ ആരോപണം. തുടർച്ചയായി ലൈം​ഗികാരോപണങ്ങൾ ഉയരുന്ന പശ്ചാത്തലത്തിലാണ് രാജി സംബന്ധിച്ച ആവശ്യവും ശക്തമായത്.