നാലര വര്‍ഷം ഹേമകമ്മിറ്റി റിപ്പോര്‍ട്ടിന് മുകളില്‍ അടയിരുന്നതിന്റെ രഹസ്യമെന്ത്?, സോളാര്‍ കമ്മീഷന്‍ റിപ്പോര്‍ട്ട് ദിവസങ്ങള്‍ക്കുള്ളില്‍ പുറത്തു വിട്ടവരാണിവര്‍, കാരണം മുഖ്യമന്ത്രി വ്യക്തമാക്കണമെന്ന് കെ.മുരളീധരന്‍

കോഴിക്കോട് : നാലര വര്‍ഷം ഹേമകമ്മിറ്റി റിപ്പോര്‍ട്ടിന് മുകളില്‍ അടയിരുന്നതിന്റെ രഹസ്യമെന്തെന്ന് കെ.മുരളീധരന്‍ ചോദിച്ചു. അതിന്റെ കാരണം മുഖ്യമന്ത്രി വ്യക്തമാക്കണം. സോളാര്‍ കമ്മീഷന്‍ റിപ്പോര്‍ട്ട് ദിവസങ്ങള്‍ക്കുള്ളില്‍ പുറത്തു വിട്ടവരാണിവര്‍. ഹേമ കമ്മീഷന്‍ റിപ്പോര്‍ട്ട് നല്‍കിയത് മുഖ്യമന്ത്രിക്കാണ്. പിന്നെ എങ്ങനെയാണ് സര്‍ക്കാരിന് ഉത്തരവാദിത്വമില്ലാതാകുന്നത്.

സ്‌ക്രീനില്‍ നമ്മള്‍ ആരാധിക്കുന്നവര്‍ സ്‌ക്രീനിന് പുറത്ത് കശ്മലന്മാരാണെന്ന് മനസിലായി. തെറ്റ് ചെയ്തവരുടെ പേര് പുറത്ത് പറഞ്ഞില്ലെങ്കില്‍ മാന്യന്മാരും സംശയ നിഴലിലാകും. തെറ്റ് ചെയ്തവരുടെ പേര് പുറത്ത് വിടാതിരിക്കാന്‍ സര്‍ക്കാരിന് എന്താണ് ഇത്ര താത്പര്യമെന്നും അദ്ദേഹം ചോദിച്ചു. 

പൊതുപ്രവര്‍ത്തകരെന്നാല്‍ തുറന്ന പുസ്തകമാണ്. പൊതുപ്രവര്‍ത്തകരേക്കാള്‍ വലുതല്ലല്ലോ സിനിമ പ്രവര്‍ത്തകര്‍. ഇരകളുടെ പേരല്ലേ വെളിപ്പെടുത്താന്‍ പാടില്ലാത്തത്. തെറ്റ് ചെയ്ത കശ്മലന്മാരുടെ പേര് വെളിപ്പെടുത്താത്തത് എന്താണെന്നും കോ.മുരളീധരന്‍ ചോദിച്ചു.