വി​ദേശത്ത് നിന്ന് നാട്ടിലെത്തിയിട്ട് ചെലവ് ചെയ്തില്ല....!, കൂട്ടുകാരനെ ഇടിച്ച് അവശനാക്കി സ്വർണമാല കവർന്ന് യുവാക്കൾ, ഒരാൾ പിടിയിൽ

ആലപ്പുഴ : വിദേശത്ത് നിന്നെത്തിയിട്ട് ചെലവ് ചെയ്യാത്ത സുഹൃത്തിനെ മർദ്ദിച്ചതിന് ശേഷം സ്വർണമാല കവർന്ന സംഭവത്തിൽ ഒളിവൽ പോയ പ്രതിയെ പിടികൂടി പൊലീസ്. വള്ളികുന്നം താമരക്കുളം സ്വദേശി ദീപു (30) ആണ് പൊലീസ് പിടിയിലായത്. കേസിൽ ഒളിവിൽ പോയ പ്രതിയെ അഞ്ചു മാസത്തിന് ശേഷമാണ് പിടികൂടിയത്. ‌‌‌ഇലിപ്പക്കുളം കുറ്റിപ്പുറം സ്വദേശി ആകാശിന്റെ മാലയാണ് പ്രതി പൊട്ടിച്ചെടുത്തത്.

കഴിഞ്ഞ ഫെബ്രുവരി 16-ന് രാത്രിയിൽ ഇലപ്പിക്കുളത്ത് വച്ചാണ് കേസിനാസ്പദമായ സംഭവം നടന്നത്. കേസിലെ രണ്ടും മൂന്നും പ്രതികളായ വള്ളികുന്നം സ്വദേശി ഗോകുൽ (28), അരുൺ (27) എന്നിവരെ നേരത്തെ പിടികൂടിയിരുന്നു. വിദേശത്ത് നിന്നും നാട്ടിലെത്തിയ ആകാശിനോട് ചെലവ് ചെയ്യാൻ അരുൺ ആവശ്യപ്പെട്ടിരുന്നു.

ഇതിന് വിസമ്മതിച്ചതിനാണ് സുഹൃത്തുക്കളായ ദീപുവും അരുണും ​ഗോകുലും ചേർന്ന് മർദ്ദിച്ചത്. ശേഷം കഴുത്തിലെ സ്വർണമാല പൊട്ടിച്ചെടുത്ത് കടന്നു കളയുകയും ചെയ്തു. സംഭവത്തിന് ശേഷം ഒളിവിൽ പോയ ദീപുവിനെ വള്ളികുന്നം സംസ്കൃത സ്കൂളിനു സമീപത്തുവച്ചാണ് പിടികൂടിയത്.