റോഡിലൂടെ നടന്നുപോയ യുവാവിനെ അജ്ഞാത വാഹനം ഇടിച്ച് തെറിപ്പിച്ചു...!, ചോര വാർന്ന് റോഡിൽ യുവാവ് കിടന്നത് മണിക്കൂറുകളോളം, വിവരം ലഭിച്ച് പൊലീസ് എത്തുമ്പോഴേക്കും ദാരുണ മരണം, വാഹനം കണ്ടെത്താൻ തിരച്ചിൽ

തിരുവനന്തപുരം : കല്ലമ്പലം ദേശീയ പാതയില്‍ അജ്ഞാത വാഹനമിടിച്ച് യുവാവിന് ദാരുണാന്ത്യം. 

ചിറയിന്‍കീഴ് മുടപുരം സ്വദേശി വിനോദ്(43)ആണ് മരിച്ചത്. നാവായികുളം ഐ ഒ ബി ബാങ്കിന് മുന്‍വശം അര്‍ദ്ധരാത്രിയോടെയാണ് അപകടമുണ്ടായത്. 

റോഡിലൂടെ നടന്നുപോകുകയായിരുന്ന വെല്‍ഡിങ് തൊഴിലാളിയായ വിനോദിനെ വാഹനം ഇടിച്ചു തെറിപ്പിക്കുകയായിരുന്നു. അപകടത്തില്‍പ്പെട്ട യുവാവ് റോഡില്‍ വെച്ചു തന്നെ മരിച്ചു. യുവാവിനെ ഇടിച്ചു തെറിപ്പിച്ചശേഷം വാഹനം നിര്‍ത്താതെ പോയി.

റോഡില്‍ ഒരു യുവാവ് കിടക്കുന്നതായി പൊലീസ് കണ്‍ട്രോള്‍ റൂമില്‍ വിവരം ലഭിച്ചതിനെ തുടര്‍ന്ന് പൊലീസ് എത്തിയാണ് മൃതദേഹം ആശുപത്രിയിലേക്ക് മാറ്റിയത്. 

പൊലീസ് എത്തുമ്പോഴേക്കും വിനോദ് മരിച്ചിരുന്നു. ഇടിച്ചു തെറിപ്പിച്ച വാഹനം കണ്ടെത്താനായി പൊലീസ് അന്വേഷണം ആരംഭിച്ചു. പ്രദേശത്തെ സിസിടിവി ദൃശ്യങ്ങള്‍ കല്ലമ്പലം പൊലീസ് ശേഖരിച്ചിട്ടുണ്ട്.