ഇൻഷുറൻസ് കമ്പനിയുടെ ഓഫീസിന് തീപിടിച്ച് രണ്ടു പേർ പൊള്ളലേറ്റ് മരിച്ചു...!, മരിച്ചത് 35-കാരിയും ഭർത്താവുമെന്ന് പോലീസിന് വിവരം, കൊലപാതകമെന്ന് സൂചന

തിരുവനന്തപുരം പാപ്പനംകോടിലെ ഇൻഷുറൻസ് ഓഫീസിന് തീപിടിച്ച് രണ്ടു പേർ മരിച്ചു. പാപ്പനംകോട് ജംങ്ഷനില്‍ തന്നെ പ്രവർത്തിക്കുന്ന സ്ഥാപനമായ ന്യൂ ഇന്ത്യ അഷ്യുറൻസ് കമ്പനിക്കാണ് തീപിടിച്ചത്. ഇന്‍ഷൂറന്‍സ് കമ്പനിയിലെ ജീവനക്കാരിയായ വൈഷ്ണവി (35) ഭർത്താവ് ബിനു ഗുരുതരമായി പൊള്ളലേറ്റ് മരിച്ചത്. ഫയർഫോഴ്സ് എത്തിയാണ് തീ അണച്ചത്. ഇവർ അപകട സമയത്ത് ഓഫീസിന് അകത്ത് പെട്ടുപോയവരാണെന്നാണ് ആദ്യം ലഭിച്ച വിവരം. തുടർന്ന് അന്വേഷണത്തിൽ വൈഷ്ണവിയെ കൊലപ്പെടുത്തി ഭർത്താവ് ജീവനൊടുക്കിയതാണെന്നാണ് ഇപ്പോൾ ഉയരുന്ന സംശയം. മൃതദേഹം ഭർത്താവ് ബിനുവിന്റേത് എന്ന് പരിശോധിക്കാൻ ഡിഎൻഎ പരിശോധന നടത്തും. രാവിലെ സ്ഥലത്ത് ഒരു പുരുഷൻ പ്രശ്നമുണ്ടാക്കിയെന്ന് ദൃക്സാക്ഷി പറഞ്ഞിരുന്നു. ഇതോടെ സമീപത്തെ സിസിടിവി ദൃശ്യങ്ങൾ അടക്കം പരിശോധിക്കുകയാണ് പൊലീസ്.  

മന്ത്രി വി ശിവൻകുട്ടി, മന്ത്രി കെ രാജൻ ജില്ലാ കളക്ടർ അനുകുമാരി തുടങ്ങിയവർ സ്ഥലം സന്ദർശിച്ചു. തീ പിടിത്തത്തിൽ ദുരൂഹതയുണ്ടോയെന്ന് പരിശോധിക്കുമെന്നും മന്ത്രിമാരും കളക്ടറും വ്യക്തമാക്കിയിരുന്നു. പിന്നാലെയാണ് അന്വേഷണത്തിലെ പുതിയ വിവരങ്ങൾ പുറത്തുവരുന്നത്. അസ്വാഭാവിക മരണത്തിന് നേമം പൊലീസ് കേസെടുത്തിട്ടുണ്ട്. ന്യൂ ഇന്ത്യ അഷ്വറൻസ് കമ്പനിയുടെ ഓഫീസിലാണ് തീപിടിത്തമുണ്ടായത്. ഓഫീസിന് മുന്നിലുള്ള ഗ്ലാസിന്‍റെ ചില്ല് പൊട്ടിവീണതോടെയാണ് സമീപവാസികൾ ഇൻഷുറൻസ് കമ്പനിയുടെ ഓഫീസിലേക്ക് ശ്രദ്ധിച്ചത്. തൊട്ടുപിന്നാലെ തീ ആളിപ്പടരുകയായിരുന്നു.ഇൻഷുറൻസ് കമ്പനി ഓഫീസിലെ എയർ കണ്ടീഷണർ പൊട്ടിത്തെറിച്ചാണ് അപകടമുണ്ടായതെന്നായിരുന്നു പ്രാഥമിക നിഗമനം.