ലെബനനിൽ വെടിനിർത്തൽ കരാർ; ഹിസ്ബുല്ലയുമായുള്ള കരാറിന് അംഗീകാരം നൽകി ഇസ്രായേൽ, ശക്തമായി തിരിച്ചടിക്കുമെന്ന് മുന്നറിയിപ്പ്

വെടിനിർത്തൽ കരാറിലേർപ്പെട്ട് ഇസ്രായേലും ഹിസ്ബുള്ളയും. സുരക്ഷാ മന്ത്രിസഭ യോഗത്തിന് ശേഷമാണ് ഹിസ്ബുല്ലയുമായുള്ള വെടിനിർത്തൽ കരാറിന് രൂപം നൽകിയ കാര്യം നെതന്യാഹു പ്രഖ്യാപിച്ചത്.കരാറിന്റെ രൂപരേഖ മന്ത്രിസഭയുടെ അംഗീകാരത്തിനായി സമർപ്പിച്ചതായും നെതന്യാഹു പറഞ്ഞു.

എന്നാൽ ലെബനനിൽ എന്ത് സംഭവിക്കുന്നു എന്നതിനെ ആശ്രയിച്ചായിരിക്കും വെടിനിർത്തൽ കരാറിന്റെ കാലാവധി തീരുമാനിക്കപ്പെടുന്നതെന്ന് നെതന്യാഹു വ്യക്തമാക്കി. കരാർ ലംഘിച്ച് ഏതെങ്കിലും രീതിയിൽ ആക്രമണം നടത്താൻ ഹിസ്ബുള്ള ശ്രമിച്ചാൽ ഞങ്ങൾ ശക്തമായി തന്നെ തിരിച്ചടിക്കും. 

അതിർത്തിക്ക് സമീപത്ത് നിന്നും തുടച്ചുനീക്കിയ അടിസ്ഥാന സൗകര്യങ്ങൾ പുനർനിർമിക്കാൻ തീവ്രവാദികൾ ശ്രമിച്ചാലും അതിന് പ്രതികരിക്കും. ആക്രമണം തുടങ്ങിയ ദിവസങ്ങളെ വച്ച് നോക്കിയാൽ ഹിസ്ബുള്ള ഭീകരർ ഇന്ന് ദുർബലരായിരിക്കുകയാണ്. ഭീകരസംഘടനയുടെ നേതൃനിരയേയും അവരുടെ ആയുധശേഷിയേയും തകർത്തെറിയാൻ ഇസ്രായേൽ സൈന്യത്തിന് സാധിച്ചുവെന്നും” നെതന്യാഹു പറയുന്നു.

ഇറാനിൽ നിന്ന് ഇസ്രായേലിനെതിരെ ഉയരുന്ന ഭീഷണിയിലേക്ക് ശ്രദ്ധ കേന്ദ്രീകരിക്കുക, സേനാവിഭാഗത്തിന് വിശ്രമം നൽകിക്കൊണ്ട് ആയുധശഖരം വർദ്ധിപ്പിക്കുക, ഹമാസിനെ ഒറ്റപ്പെടുത്തുക എന്നീ ലക്ഷ്യങ്ങളാണ് വെടിനിർത്തൽ കരാർ അംഗീകരിക്കുന്നതിന് കാരണമായത്.

അതേസമയം വെടിനിർത്തലിന് നേരത്തെ തന്നെ സമ്മതം മൂളിയ ഹിസ്ബുല്ല നെതന്യാഹുവിന്‍റെ പ്രഖ്യാപനത്തിനോട് ഇതുവരെ പ്രതികരിച്ചിട്ടില്ല.