ശബരിമല പതിനെട്ടാം പടിയിലെ ഫോട്ടോഷൂട്ട്: പൊലീസുകാർക്ക് പ്രത്യേക പരിശീലനവും പരിസരം വൃത്തിയാക്കലും ശിക്ഷ

തിരുവനന്തപുരം : ശബരിമലയിലെ പതിനെട്ടാം പടിയിലെ ഫോട്ടോഷൂട്ടിൽ പൊലീസുകാര്‍ക്കെതിരെ നടപടി സ്വീകരിച്ചു. എഡിജിപി എസ്‍ ശ്രീജിത്തിന്റെ നിർദേശ പ്രകാരം എസ്‍എപി ക്യാമ്പസിലെ 23 പൊലീസുകാര്‍ക്കെതിരെ ആണ് നടപടിയെടുത്തിരിക്കുന്നത്. കണ്ണൂര്‍ കെഎപി -4 ക്യാമ്പിൽ നല്ല നടപ്പ് പരിശീലനത്തിന് ആണ് എഡിജിപി നിര്‍ദേശം നൽകിയത്.

പതിനെട്ടാം പടിയിൽ പുറം തിരിഞ്ഞിരുന്ന് പൊലീസുകാര്‍ ഫോട്ടോ എടുത്തത് വിവാദമായിരുന്നു. ഫോട്ടോ സാമൂഹിക മാധ്യമങ്ങളിൽ പ്രചരിക്കുകയും ചെയ്തു. തുടര്‍ന്നാണ് പൊലീസ് നടപടി.

നടപടിയെ തുടര്‍ന്ന് 23 പൊലീസുകാരും ശബരിമലയിൽ നിന്ന് പരിശീലനത്തിനായി മടങ്ങി. തീവ്ര പരിശീലനം നൽകണമെന്നാണ് എഡിജിപിയുടെ നിര്‍ദേശം. ഇതുമായി ബന്ധപ്പെട്ട് ഹൈക്കോടതിയിൽ നാളെ റിപ്പോര്‍ട്ട് നൽകും.