അമ്മൂമ്മയുടെ മാല പണയംവെച്ച് കിട്ടിയ തുകയിൽ നിന്ന് കടക്കാർക്ക് നാല്പതിനായിരം നൽകി; അമ്മ ഷെമിക്ക് 65 ലക്ഷം കടബാധ്യതയുണ്ടെന്ന് പോലീസിന് വിവരം; സാമ്പത്തിക ബാധ്യതയുണ്ടെന്ന അഫാന്റെ മൊഴി ശരിവെച്ച് പൊലീസ്

തിരുവനന്തപുരം : വെഞ്ഞാറമൂടിലെ കൂട്ടക്കൊലപാതകങ്ങൾക്കു പിന്നിൽ കുടുംബത്തിന്‍റെ സാമ്പത്തിക ബാധ്യതയെന്ന അഫാന്റെ മൊഴി പൊലീസ് അന്വേഷണത്തിൽ ശരിവെച്ചു. കൊലപാതകങ്ങൾക്കിടയിലും അമ്മൂമ്മയുടെ മാല പണയംവെച്ച് കിട്ടിയ തുകയിൽ നിന്ന് ₹40,000 കടം തീർപ്പാക്കാൻ ഉപയോഗിച്ചതായും പൊലീസ് കണ്ടെത്തി. അഫാന്റെ അമ്മ ഷെമിക്ക് ₹65 ലക്ഷം കടബാധ്യതയുണ്ടെന്ന് വിവരം ലഭിച്ചതായും ഇത് അഫാന്റെ മൊഴിയിലൂടെ സ്ഥിരീകരിക്കാൻ പൊലീസ് ശ്രമിക്കുകയാണെന്നും അന്വേഷണ സംഘം വ്യക്തമാക്കി.

വെഞ്ഞാറമൂട് സ്റ്റേഷനിൽ എത്തിയപ്പോൾ "ജീവിതവുമായി മുന്നോട്ട് പോകാൻ കഴിയുന്നില്ല, അത്രമാത്രം സാമ്പത്തിക ബാധ്യതയുണ്ട്" എന്ന് അഫാൻ പറഞ്ഞതായി പൊലീസ് പറയുന്നു. തന്റെ മൊഴിയും പൊലീസിന്റെ അന്വേഷണത്തിലൂടെ കണ്ടെത്തിയ തെളിവുകളും തമ്മിൽ പൊരുത്തപ്പെടുന്നതായും ഉദ്യോഗസ്ഥർ വ്യക്തമാക്കി.

1. അമ്മയെ കൊലപ്പെടുത്താനം ശ്രമം നടത്തിയ ശേഷം അഫാൻ പാങ്ങോട് അമ്മൂമ്മ സൽമാ ബീവിയുടെ വീട്ടിലേക്ക് പോയി.

2. 9 മിനിറ്റിനകം അമ്മൂമ്മയെ കൊലപ്പെടുത്തി മാല എടുത്തു.

3. വെഞ്ഞാറമൂട് ജംഗ്ഷനിലെ സ്വകാര്യ ധനകാര്യ സ്ഥാപനത്തിൽ മാല പണയംവെച്ച് ₹74,000 പണം വാങ്ങി.

4. ഇതിൽ ₹40,000 ഉപയോഗിച്ച് ഫെഡറൽ ബാങ്ക് അക്കൗണ്ട് വഴി ഒരു കടം തീർപ്പാക്കി.

5. അടുത്ത കൊലപാതകത്തിനായി എസ്.എൻ.പുരത്ത് പിതാവിന്റെ സഹോദരന്റെ വീട്ടിൽ എത്തി.

6. അവിടെ പണം ചോദിച്ച ശേഷം പിതാവിന്റെ സഹോദരനെയും ഭാര്യയെയും കൊലപ്പെടുത്തി.

ഇന്നലെ രാത്രി ആറ്റിങ്ങൽ ഡിവൈ.എസ്.പി മെഡിക്കൽ കോളേജിൽ എത്തി അഫാന്റെ മൊഴിയെടുക്കാൻ ശ്രമിച്ചെങ്കിലും അദ്ദേഹത്തിന്റെ മാനസികാവസ്ഥ മോശമായതിനാൽ നടപടി തുടരാനായില്ല. ഇന്ന് വീണ്ടും മൊഴി രേഖപ്പെടുത്താൻ അന്വേഷണ സംഘം ശ്രമിക്കുകയാണ്.

അഫാന്റെയും മാതാവ് ഷമിയുടെയും മൊബൈൽ ഫോണുകൾ ഫോറൻസിക് പരിശോധനയ്ക്കായി അയച്ചിട്ടുണ്ട്. കൂടാതെ അഫാൻ ഗൂഗിൾ സെർച്ച് ഹിസ്റ്ററിയിൽ "കൂട്ട ആത്മഹത്യയ്ക്കുള്ള മാർഗങ്ങൾ" അന്വേഷിച്ചിരുന്നതായി മൊഴി നൽകിയതോടെ, ഇത് സ്ഥിരീകരിക്കാൻ സൈബർ പൊലീസിനും കത്ത് നൽകിയിരിക്കുകയാണ്.