മുഖ്യമന്ത്രിയെ വിമർശിച്ച നടൻ പോസാനി കൃഷ്ണ മുരളി അറസ്റ്റിൽ; അറസ്റ്റ് സാമൂഹിക മാധ്യമങ്ങളിലൂടെ നടത്തിയ പരാമർശങ്ങളുടെ പേരിൽ

ഹൈദരാബാദ് : പ്രശസ്ത തെലുങ്ക് ചലച്ചിത്ര നടനും എഴുത്തുകാരനുമായ പോസാനി കൃഷ്ണ മുരളിയെ ആന്ധ്രപ്രദേശ് പൊലീസ് അറസ്റ്റ് ചെയ്തു. ആന്ധ്രപ്രദേശ് മുഖ്യമന്ത്രി ചന്ദ്രബാബു നായിഡുവിനെയും ഉപമുഖ്യമന്ത്രി പവൻ കല്യാണിനെയും അപകീർത്തിപ്പെടുത്തിയ പരാമർശങ്ങൾ നടത്തിയതിന്റെ പേരിലാണ് അറസ്റ്റ്.

ഹൈദരാബാദിലെ യെല്ലാരെഡ്ഡിഗുഡയിലെ വസതിയിൽ നിന്നാണ് ആന്ധ്രപ്രദേശ് പൊലീസ് ഫെബ്രുവരി 26-ന് രാത്രി കൃഷ്ണ മുരളിയെ കസ്റ്റഡിയിലെടുത്തത്. ചന്ദ്രഗിരി പോലീസ് സ്റ്റേഷനിൽ ഐപിസി 153A (സമൂഹങ്ങൾക്കിടയിലുള്ള വിദ്വേഷ പ്രചാരണം), 505(2) (അസാധാരണ പ്രസ്താവനകൾ), 294(b) (അശ്ലീല പരാമർശങ്ങൾ) എന്നീ വകുപ്പുകൾ പ്രകാരം ജാമ്യമില്ലാ കേസുകൾ ചുമത്തിയിട്ടുണ്ടെന്ന് റിപ്പോർട്ടുകളുണ്ട്.

കഴിഞ്ഞ കുറച്ച് ദിവസങ്ങളായി മാധ്യമങ്ങളിലൂടെയും സാമൂഹിക മാധ്യമങ്ങളിലൂടെയും നടത്തിയ പരാമർശങ്ങൾ ആന്ധ്രപ്രദേശ് സർക്കാരിനെയും മന്ത്രിമാരെയും അപകീർത്തിപ്പെടുത്തുന്ന തരത്തിലായിരുന്നു. പ്രതിഷേധങ്ങളുടെ അടിസ്ഥാനത്തിലാണ് പൊലീസ് നടപടിയെടുത്തത്.

പോസാനി കൃഷ്ണ മുരളി വൈ.എസ്.ആർ. കോൺഗ്രസ് പാർട്ടിയുമായി അടുത്ത ബന്ധം പുലർത്തിയിരുന്നുവെങ്കിലും, 2024 തിരഞ്ഞെടുപ്പിന് ശേഷം രാഷ്ട്രീയത്തിൽ നിന്ന് അകന്നു നിന്നിരുന്നു. പൊലീസ് അറസ്റ്റിനു പിന്നാലെ നടൻ ആരോഗ്യ പ്രശ്നങ്ങൾ ഉന്നയിച്ചെങ്കിലും, അദ്ദേഹത്തെ ആന്ധ്രപ്രദേശിലേക്ക് മാറ്റി.

അറസ്റ്റുമായി ബന്ധപ്പെട്ട കൂടുതൽ അന്വേഷണം പുരോഗമിക്കുകയാണ്.