കൊല്ലത്ത് മകന്റെ മുന്നിൽ വച്ച് അച്ഛനെ വെട്ടി കൊലപ്പെടുത്തിയ കേസിൽ പ്രതി കുറ്റക്കാരനെന്ന് കോടതി; പ്രതിക്കെതിരായ ശിക്ഷാവിധി ഇന്ന് പ്രഖ്യാപിക്കും

കൊല്ലം : മകന്റെ മുന്നിൽ വച്ച് അച്ഛനെ വെട്ടി കൊലപ്പെടുത്തിയ കേസിൽ പ്രതിയെ കുറ്റക്കാരനായി കോടതി കണ്ടെത്തി. അലയമൺ ആനക്കളം മെത്രാൻ തോട്ടത്തിൽ കമ്പകത്തട്ടിൽ കുട്ടപ്പനെ കൊലപ്പെടുത്തിയ കേസിൽ അഞ്ചൽ അലയമൺ മുങ്ങോട് ഇടക്കുന്നിൽ വീട്ടിൽ ലൈബുവിനെയാണ് (46) കൊല്ലം നാലാം അഡീഷണൽ സെഷൻസ് കോടതി ജഡ്ജി എസ്. സുഭാഷ് കുറ്റക്കാരനാണെന്ന് വിധിച്ചത്. ശിക്ഷ ഇന്ന് (ഫെബ്രുവരി 25) പ്രഖ്യാപിക്കും.

2020 ഏപ്രിൽ 20ന് രാത്രി 7.30 ഓടെയാണ് കേസിനാസ്പദമായ കൊലപാതകം നടന്നത്. കൊല്ലപ്പെട്ട കുട്ടപ്പൻ പ്രതിയുടെ കൃഷിയിടത്തിലെ ജോലിക്കാരനും അടുത്ത സുഹൃത്തുമായിരുന്നു. പ്രതിയുടെ ഭാര്യയെ കുറിച്ചും തന്നെക്കുറിച്ചും കുട്ടപ്പൻ അപവാദങ്ങൾ പ്രചരിപ്പിച്ചതായി ലൈബു സംശയിച്ചു. ഇതേതുടർന്ന് കുട്ടപ്പനെ കൊലപ്പെടുത്തണമെന്ന് പ്രതി തീരുമാനിച്ചു.

2020 ഏപ്രിൽ 20ന് വൈകിട്ട് 3.30 ഓടെ, പ്രതി ഓട്ടോറിക്ഷയിൽ കുട്ടപ്പനെ തന്റെ വീട്ടിലേക്ക് കൂട്ടിക്കൊണ്ടുവന്നു. വീട്ടിലെ ഹാൾ മുറിയിലെ കട്ടിലിൽ ഇരുത്തിയ ശേഷം മദ്യം നൽകി. അവശനായ കുട്ടപ്പനെ കട്ടിലിൽ നിന്ന് ചവിട്ടി താഴെയിട്ട്, തുടർന്ന് പുറത്തു നിന്നുകൊണ്ട് കൊടുവാൾ ഉപയോഗിച്ച് തലയിലും ശരീരത്തിന്റെ വിവിധ ഭാഗങ്ങളിലും വെട്ടുകയായിരുന്നു.

കുട്ടപ്പൻ തിരികെ വീട്ടിൽ വരാൻ വൈകിയതോടെ മകൻ വിഷ്ണു അന്വേഷണം നടത്തി പ്രതിയുടെ വീട്ടിലെത്തി. അച്ഛനെ ക്രൂരമായി ആക്രമിക്കുന്നത് കണ്ട വിഷ്ണു ഉടൻ പൊലീസിനെ അറിയിച്ചു. കുട്ടപ്പനെ ആശുപത്രിയിൽ എത്തിച്ചെങ്കിലും മരണം സംഭവിച്ചു.

അഞ്ചൽ പൊലീസ് എസ്.എച്ച്.ഒ സൈജുനാഥ് രജിസ്റ്റർ ചെയ്ത് ഇൻസ്പെക്ടർ കെ.ജി. ഗോപകുമാറിന്റെ നേതൃത്വത്തിൽ അന്വേഷണം നടത്തി. അതിന്റെ അടിസ്ഥാനത്തിൽ പ്രതിക്കെതിരെ കുറ്റപത്രം സമർപ്പിച്ചു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ വി. വിനോദ് ഹാജരായി.

പ്രതി കുറ്റക്കാരനാണെന്ന് കോടതി വിധിച്ച സാഹചര്യത്തിൽ, ഇന്ന് ശിക്ഷ പ്രഖ്യാപിക്കുമെന്ന് കോടതിവൃത്തങ്ങൾ അറിയിച്ചു.