പി.വി. അൻവറിനൊപ്പം പ്രവർത്തിക്കാനില്ല; തൃണമൂൽ എൻഡിഎയിൽ ചേരുമെന്ന് ഉറപ്പുണ്ട്; തൃണമൂൽ കോൺഗ്രസ് സംസ്ഥാന കോർഡിനേറ്റർ മിൻഹാജ് സിപിഎമ്മിൽ ചേർന്നു

പാലക്കാട് : തൃണമൂൽ കോൺഗ്രസ് സംസ്ഥാന കോർഡിനേറ്റർ മിൻഹാജ് രാജിവെച്ച് സിപിഎമ്മിൽ ചേർന്നു. പി.വി. അൻവറിനൊപ്പം തൃണമൂൽ കോൺഗ്രസിൽ പ്രവർത്തിക്കാനില്ലെന്ന നിലപാടാണ് രാജിക്ക് കാരണമെന്നാണ് മിൻഹാജ് വ്യക്തമാക്കിയത്. തൃണമൂലിലെ എല്ലാ സ്ഥാനങ്ങളും രാജിവെച്ചതായും അദ്ദേഹം അറിയിച്ചു.

തുടർച്ചയായ രാഷ്ട്രീയ മാറ്റങ്ങൾ

മുൻപ് അൻവർ പ്രഖ്യാപിച്ച ഡിഎംകെ സ്ഥാനാർത്ഥിയുമായിരുന്ന മിൻഹാജ് അൻവറിനൊപ്പം സജീവമായി പ്രവർത്തിച്ചിരുന്നു. "ഡിഎംകെയിൽ ചേർന്നത് തമിഴ്നാട്ടിലെ പ്രധാന രാഷ്ട്രീയ കക്ഷിയായതിനാലായിരുന്നു. എന്നാൽ ഉപതെരഞ്ഞെടുപ്പിന് ശേഷം ഡിഎംകെ സഹകരിക്കില്ലെന്ന് മനസ്സിലായി. അതിനാലാണ് തൃണമൂലിലേക്ക് ചേർന്നത്," മിൻഹാജ് വ്യക്തമാക്കി. തൃണമൂൽ എൻഡിഎയിൽ ചേരുമെന്ന് ഉറപ്പുണ്ടെന്നും അതിനാലാണ് പാർട്ടി വിടുന്നതെന്നും അദ്ദേഹം കൂട്ടിച്ചേർത്തു. രാഷ്ട്രീയ സജീവത തുടരുമെന്നും ഇനി സിപിഎമ്മിനൊപ്പം പ്രവർത്തിക്കുമെന്നും മിൻഹാജ് വ്യക്തമാക്കി.