ഓട്ടോയിൽ കയറ്റി ഇഷ്ടഭക്ഷണമായ കുഴിമന്തി വാങ്ങിവരാൻ പറഞ്ഞയച്ചു; തിരിച്ചെത്തിയപ്പോൾ വാതിൽപടിയിൽ വെച്ച് ഉമ്മയുൾപ്പെടെയുള്ളവരെ കൊലപ്പെടുത്തിയതായി ആ 14 കാരനോട് വിവരിച്ചു; പേടിച്ച് അലറിക്കരഞ്ഞപ്പോൾ അവിടെവച്ചു തന്നെ അടിച്ച് കൊലപ്പെടുത്തി; ഞെട്ടിക്കുന്ന അഫാന്റെ മൊഴിയുടെ കൂടുതൽ വിവരങ്ങൾ

തിരുവനന്തപുരം : വെഞ്ഞാറമൂട് കൂട്ടക്കൊലക്കേസിലെ പ്രതി അഫാന്റെ ക്രൂരമായ കൊലപാതക മൊഴിയുടെ കൂടുതൽ വിശദാംശങ്ങൾ പുറത്തുവന്നു. അമ്മയെ ആക്രമിച്ചതും ബന്ധുക്കളെ കൊലപ്പെടുത്തിയതും എണ്ണിയെണ്ണി തന്റെ ഇളയ സഹോദരനായ അഫ്സാനെ അറിയിച്ച ശേഷമാണ് അവനെ ചുറ്റികകൊണ്ട് തലയ്ക്കടിച്ച് കൊന്നതെന്നാണ് അഫാൻ പോലീസിന് മൊഴി നൽകിയിരിക്കുന്നത്.

ആസുത്രിതമായ കൊലപാതകം : അന്നേദിവസം സ്‌കൂൾ വിട്ട് വീട്ടിലെത്തിയ അഫ്സാനെ, വെഞ്ഞാറമൂട് നിന്ന് കുഴിമന്തി വാങ്ങാൻ അയച്ചു. ഇതിനായി ഓട്ടോറിക്ഷ ഏർപ്പാടാക്കുകയും ചെയ്തു. അഫ്സാൻ തിരിച്ചെത്തുമ്പോഴേക്കും അഫാൻ എല്ലാം ഒരുക്കിയിരുന്നു. അഫ്സാനോട് വീടിന്റെ മുൻവശത്തെ വാതിൽപ്പടിയിൽ ഇരുത്തി, അമ്മയേയും ബന്ധുക്കളേയും കൊന്ന കാര്യം തുറന്ന് പറഞ്ഞു. ഈ വിവരം കേട്ട് പേടിച്ച് നിലവിളിച്ച അനുജനെ അഫാൻ ഉടൻ തന്നെ ആക്രമിച്ചു. അഫ്സാന്റെ മരണം ഉറപ്പാക്കിയ ശേഷം കൈവശമുണ്ടായിരുന്ന നോട്ടുകൾ അവന്റെ ശരീരത്തിലേക്ക് വലിച്ചെറിയുകയായിരുന്നുവെന്ന് മൊഴിയിൽ പറയുന്നു.

പെൺസുഹൃത്ത് ഫർസാനയുടെ കൊലപാതകവും സമ്മതിച്ചു : ഇതിനുശേഷമാണ് അഫാൻ തന്റെ പെൺസുഹൃത്തായ ഫർസാനയെ കൊലപ്പെടുത്തിയതായും സമ്മതിച്ചത്. 'അമ്മയെയും അമ്മൂമ്മയെയും അടക്കം കൊന്നു. ഇത് കേട്ട ഫർസാന ഞെട്ടി. "ഇനി നമ്മളെങ്ങനെ ജീവിക്കും?" എന്ന് ചോദിച്ചു. ഉടൻ ചുറ്റിക ഉപയോഗിച്ച് അവളെയും തലയ്ക്കടിച്ച് കൊന്നു,' അഫാൻ പോലീസിനോട് പറഞ്ഞു. ഫർസാന സംഭവത്തിന്റെ ഭീകരത മനസ്സിലാക്കി, കസേരയിൽ തലയിൽ കൈവച്ച് ഇരിക്കുമ്പോഴാണ് അഫാൻ ചുറ്റികകൊണ്ട് ആഞ്ഞ് അടിച്ചതെന്നാണ് അന്വേഷണ റിപ്പോർട്ടുകൾ സൂചിപ്പിക്കുന്നത്.

മദ്യപിച്ച് സ്റ്റേഷനിലെത്തിയ അഫാൻ : അഫ്സാനെ കൊന്ന ശേഷം അഫാൻ കുളിച്ച് വസ്ത്രം മാറി പുറത്തിറങ്ങി. ബൈക്കിൽ കയറാൻ ശ്രമിച്ചെങ്കിലും മദ്യപിച്ചിരുന്നതിനാൽ സ്റ്റാർട്ട് ചെയ്യാൻ കഴിഞ്ഞില്ല. തുടർന്ന് ഓട്ടോറിക്ഷയിൽ വെഞ്ഞാറമൂട് പോലീസ് സ്റ്റേഷനിൽ എത്തുകയായിരുന്നുവെന്ന് മൊഴിയിൽ പറയുന്നു.

അഫാനെ ഇന്ന് ജയിലിലേക്ക് മാറ്റും : അഫാന്റെ ആരോഗ്യനില മെച്ചപ്പെട്ടതിനാൽ ഇന്ന് മെഡിക്കൽ കോളേജ് ആശുപത്രിയിൽ നിന്ന് ജയിലിലേക്ക് മാറ്റുമെന്നാണ് റിപ്പോർട്ടുകൾ. കൂട്ടക്കൊലയുമായി ബന്ധപ്പെട്ട് രണ്ട് കേസുകളിൽ കൂടി അറസ്റ്റുകൾ ഉണ്ടാകാനാണ് സാധ്യത. പോലീസ് ഇതുവരെ ഈ മൊഴികളുടെ ഔദ്യോഗിക സ്ഥിരീകരണം നടത്തിയിട്ടില്ല. എന്നാൽ, അഫാന്റെ കുറ്റസമ്മത മൊഴികൾ കേസിന്റെ ദിശ മാറ്റാനിടയാകുമെന്ന് അന്വേഷണ ഉദ്യോഗസ്ഥർ വിലയിരുത്തുന്നു.