അഞ്ചാലുംമൂട് അനില പിടിയിലാവുന്നത് ഇത് രണ്ടാം തവണ; ഇത്തവണ പിടിച്ചെടുത്തത് വിപണിയിൽ മൂന്ന് ലക്ഷം രൂപ വിലവരുന്ന 50 ഗ്രാം എം.ഡി.എം.എ; നീണ്ടകര പാലത്തിന് സമീപം പോലീസ് കൈകാണിച്ചെങ്കിലും രക്ഷപ്പെട്ട യുവതിയെ പൂട്ടിയത് പോലീസ് ബുദ്ധിയിൽ; പിടികൂടിയത് കമ്മീഷണർ കിരൺ നാരായണൻ ഐപിഎസിൻ്റെ നിർദ്ദേശപ്രകാരം എസിപി എസ്.ഷെരീഫിന്റെ നേതൃത്വത്തിലുള്ള പോലീസ് സംഘം

കൊല്ലം : കൊല്ലം നഗരത്തിൽ വീണ്ടും എം.ഡി.എം.എ വേട്ട. 50 ഗ്രാം എം.ഡി.എം.എ കൊണ്ടുവന്ന അഞ്ചാലുംമൂട് പെരിനാട് സ്വദേശിനി അനില രവീന്ദ്രൻ (34) (ഇടവട്ടം - സായിപം വീട്ടിൽ, ഇപ്പോൾ പനയം - രേവതി വീട്ടിൽ വാടകയ്ക്ക് താമസം) ആണ് കൊല്ലം സിറ്റി ഡാൻസാഫ് സംഘവും ശക്തികുളങ്ങര പോലീസും സംയുക്തമായി നടത്തിയ റെയ്ഡിൽ പിടിയിലായത്. കർണാടകത്തിൽ നിന്ന് കൊണ്ടുവന്ന, വിപണിയിൽ ഏകദേശം മൂന്ന് ലക്ഷം രൂപ വിലവരുന്ന മയക്കുമരുന്ന് ആണ് പെൺകാർ കൈവശം വച്ചിരുന്നത്. ശക്തികുളങ്ങര പോലീസ് സ്റ്റേഷൻ സമീപം വെച്ച് നടന്ന പരിശോധനയിലാണ് കർണ്ണാടക രജിസ്ട്രേഷൻ കാറിൽ ഒളിപ്പിച്ച നിലയിൽ എം.ഡി.എം.എ കണ്ടെത്തിയത്.

സമഗ്ര അന്വേഷണത്തോടെ പിടികൂടി

കൊല്ലം സിറ്റി പോലീസ് കമ്മീഷണർ കിരൺ നാരായണൻ ഐപിഎസ് ന് ലഭിച്ച വിശ്വാസയോഗ്യമായ രഹസ്യ വിവരത്തെ തുടർന്ന് കൊല്ലം എസിപി എസ്. ഷെരീഫിന്റെ നേതൃത്വത്തിൽ മൂന്ന് പോലീസ് സംഘങ്ങൾ രൂപീകരിച്ചു. രാവിലെ മുതൽ നഗരത്തിൽ വ്യാപക പരിശോധനയാരംഭിച്ചിരുന്നു. തുടർന്ന് വൈകിട്ട് 5.30-ന് നീണ്ടകര പാലത്തിനു സമീപം ഒരു കാറിൽ സംശയം തോന്നിയതിനെ തുടർന്ന് വാഹന പരിശോധന നടത്താൻ ശ്രമിക്കുമ്പോൾ, ഡ്രൈവർ വാഹനം നിർത്താതെ മുന്നോട്ടു പോവുകയായിരുന്നു. തുടർന്ന് ആൽത്തറമൂട്-ശക്തികുളങ്ങര പോലീസ് സ്റ്റേഷൻ പരിധിയിൽ പോലീസ് വാഹനം തടഞ്ഞ് കാറിനെ നിർത്തുകയായിരുന്നു. പൊലീസ് നടത്തിയ പരിശോധനയിൽ കാറിൽ ഒളിപ്പിച്ച 50 ഗ്രാം എം.ഡി.എം.എ കണ്ടെത്തി. പ്രതി നേരത്തെയും എം.ഡി.എം.എ കേസിൽ പിടിയിലായ വ്യക്തിയാണ്. വിദ്യാർത്ഥികൾക്കിടയിൽ വിൽപ്പന നടത്താനായിരുന്നു ഇയാൾയുടെ ശ്രമമെന്നാണ് പോലീസ് വിലയിരുത്തൽ.

കൊല്ലത്ത് ഈ മാസം ഇത് നാലാമത്തെ കൊമേഴ്സ്യൽ ക്വാണ്ടിറ്റി വേട്ട

ഇതോടെ കൊല്ലം സിറ്റി പോലീസ് ഈ മാസം മാത്രം പിടികൂടുന്ന കോമേഴ്സ്യൽ ക്വാണ്ടിറ്റി എം.ഡി.എം.എ വേട്ടകളുടെ എണ്ണം നാലായി. ശക്തികുളങ്ങര ഇൻസ്പെക്ടർ ആർ. രതീഷിന്റെ നേതൃത്വത്തിൽ ഡാൻസാഫ് സംഘവും, പോലീസ് സംഘവും ചേർന്നാണ് പ്രതിയെ പിടികൂടിയത്. പ്രതിയെ വിശദമായി ചോദ്യം ചെയ്യുന്നതോടൊപ്പം, മയക്കുമരുന്ന് വിതരണ ശൃഖലയെക്കുറിച്ച് അന്വേഷണം തുടരുകയാണെന്ന് പോലീസ് അറിയിച്ചു.