ലൈംഗിക ഉത്തേജക ഗുളികകൾ പൊടിച്ചു ചേർത്ത് മുറുക്കാൻ വിൽപ്പന; ബിഹാർ സ്വദേശി പോലീസിൻ്റെ പിടിയിലായി; റെയ്ഡിൽ 'വയാഗ്ര' പിടികൂടി

ഇടുക്കി : ലൈംഗിക ഉത്തേജക ഗുളികകൾ പൊടിച്ചു ചേർത്ത് മുറുക്കാൻ വിൽപ്പന നടത്തിയെന്ന പരാതിയിൽ ബിഹാർ പാട്ന സ്വദേശിയെ കരിമണ്ണൂർ പൊലീസ് അറസ്റ്റ് ചെയ്തു. കരിമണ്ണൂർ ബീവറേജസ് ഔട്ട്ലെറ്റിന് സമീപമുള്ള മുറുക്കാൻ കടയിൽ പൊലീസ് നടത്തിയ റെയ്ഡിൽ വൻതോതിൽ വയാഗ്ര ടാബ്ലറ്റുകളും മറ്റ് വിവിധ ഉത്തേജക ഗുളികളും ഉറക്കഗുളികളും കണ്ടെത്തി. മുഹമ്മദ് താഹിർ (60) ആണ് അറസ്റ്റിലായത്. ബിഹാറിൽ നിന്ന് 40 വർഷം മുമ്പ് കേരളത്തിലെത്തിയ ഇയാൾ വിവിധ ജോലികൾ ചെയ്തു വന്നിരുന്നുവെന്നും ഇപ്പോൾ കോട്ടയം പാലാ കരൂരിൽ താമസിച്ചുവരികയാണെന്നും പൊലീസ് അറിയിച്ചു. 

പരിശോധനയ്ക്കിടെ നിരോധിത ലഹരിവസ്തുക്കളായ ഹാൻസ്, കൂൾ എന്നിവയും കടയിൽ നിന്ന് പിടിച്ചെടുത്തു. മുറുക്കാനിൽ ഗുളികകൾ ചേർത്ത് വിൽപ്പന നടത്തിയിരുന്നതായി താഹിർ പൊലീസിനോട് സമ്മതിച്ചിട്ടുണ്ടെന്നും, ഇതിന് പുറമേ കൂടുതൽ അഴിമതി സംഘങ്ങളുമായി ഇയാൾക്ക് ബന്ധമുണ്ടോയെന്നത് പരിശോധിച്ച് വരികയാണെന്നും പൊലീസ് വ്യക്തമാക്കി.