സംസ്ഥാനം ലഹരിമാഫിയയുടെ പിടിയിലെന്ന് കെ.സുരേന്ദ്രൻ; ലഹരിക്കടത്തിനുള്ള ഫണ്ടർമാരെ കണ്ടെത്തി അവരുടെ വിദേശബന്ധങ്ങൾ അന്വേഷിക്കണമെന്ന് ആവശ്യം; സർക്കാർ ശക്തമായ നടപടികൾ കൈക്കൊള്ളണമെന്ന് ബിജെപി സംസ്ഥാന അധ്യക്ഷൻ

തിരുവനന്തപുരം : സംസ്ഥാനത്ത് ലഹരിമാഫിയയുടെ കടന്നുകയറ്റം ഗുരുതരമാണെന്നും ഇതിൽ നിന്ന് മോചിപ്പിക്കാൻ സർക്കാർ ശക്തമായ നടപടികൾ കൈക്കൊള്ളണമെന്നും ബിജെപി സംസ്ഥാന അധ്യക്ഷൻ കെ. സുരേന്ദ്രൻ.

താമരശ്ശേരിയിൽ സ്‌കൂൾ വിദ്യാർത്ഥി കൊല്ലപ്പെട്ട സംഭവം ഗൗരവതരമാണെന്ന് ചൂണ്ടിക്കാട്ടിയ അദ്ദേഹം, സ്‌കൂളുകൾ കേന്ദ്രീകരിച്ച് ലഹരി വ്യാപനം വ്യാപകമായി നടക്കുന്നുണ്ടെന്നും ആരോപിച്ചു.

"പുറത്തു നിന്നുള്ള ശക്തികൾ കുട്ടികളെ ലഹരി കടത്തലിനായി ക്യാരിയേഴ്‌സാക്കി മാറ്റുകയാണ്. ഇതിന് പിന്നിൽ രാജ്യവിരുദ്ധ ശക്തികളുടെ ഇടപെടലുണ്ടോയെന്നത് പരിശോധിക്കേണ്ടതുണ്ട്. ലഹരിക്കടത്തത്തിനുള്ള ഫണ്ടർമാരെ കണ്ടെത്തുകയും അവരുടെ വിദേശബന്ധങ്ങൾ അന്വേഷിക്കുകയും വേണം," എന്നായിരുന്നു സുരേന്ദ്രന്റെ പ്രതികരണം.

സംസ്ഥാനത്ത് ലഹരിക്കടത്തം തടയാൻ സർക്കാർ കർശന നടപടികൾ സ്വീകരിക്കണമെന്ന് ആവശ്യപ്പെട്ട അദ്ദേഹം, ഇത് യുവതലമുറയെ നശിപ്പിക്കുന്ന ഗുരുതരമായ വിഷയമാണെന്നും കൂട്ടിച്ചേർത്തു.