കൊട്ടിയം-കണ്ണനല്ലൂർ റോഡിലെ നടപ്പാത കയ്യേറി പാർക്കിംഗ്; കാൽനട യാത്രക്കാർ ദുരിതത്തിൽ

കൊട്ടിയം-കണ്ണനല്ലൂർ റോഡിൽ നടപ്പാത കയ്യേറി അനധികൃതമായി പാർക്ക് ചെയ്യുന്ന വാഹനങ്ങൾ കാൽനട യാത്രക്കാർക്കും വ്യാപാരക്കാർക്കും വല്ലാത്ത തലവേദനയാകുന്നു. റോഡിലെ തിരക്കിൽ നിന്ന് രക്ഷനേടാൻ യാത്രക്കാർ ആശ്രയിക്കേണ്ട പാതയിൽ സദാ സമയവും വാഹനങ്ങൾ നിരത്തിയിരിക്കുമ്പോഴും അധികൃതർ ഇക്കാര്യത്തിൽ കണ്ണടച്ച് നിൽക്കുന്നുവെന്നതാണ് യാത്രക്കാരുടെ പരാതിയും. മുൻപ് തിരക്കേറിയ രാവിലെയും വൈകിട്ടുമായിരുന്നു നടപ്പാതയിൽ പാർക്കിംഗ് പ്രശ്‌നം ഉണ്ടാകുന്നത്. എന്നാൽ ഇപ്പോൾ രാത്രി സമയത്തും വാഹനങ്ങൾ നീക്കാത്തത് പതിവാണ്. പഞ്ചായത്ത് അധികൃതർ ഇന്റർലോക്ക് പാകിയ പാതയുടെ വലത് ഭാഗം മുഴുവനും വാഹനങ്ങൾ കയ്യേറിയ അവസ്ഥയിലാണുള്ളത്. കൊട്ടിയം ജംഗ്‌ഷനിൽ നിന്ന് വടക്കോട്ട് കണ്ണനല്ലൂർ റോഡിന്റെ വലത് ഭാഗത്താണ് ഈ പ്രശ്‌നം ഏറ്റവും കൂടുതൽ അനുഭവപ്പെടുന്നത്. 

ബാങ്കുകളും വാണിജ്യ സമുച്ചയങ്ങളും സ്ഥിതിചെയ്യുന്ന ഈ ഭാഗത്ത് വാഹനങ്ങൾ നിറഞ്ഞുകിടക്കുന്നതിനാൽ അവിടേക്കുള്ള പ്രവേശനം യാത്രക്കാർക്കും ഉപഭോക്താക്കൾക്കും സാരമായ ബുദ്ധിമുട്ടുകൾ സൃഷ്ടിക്കുന്നു.

പ്രതിഷേധം വ്യാപകമായപ്പോൾ നേരത്തെ കൊട്ടിയം പൊലീസ് ഇടപെട്ടിരുന്നെങ്കിലും പ്രശ്‌നത്തിന് ശാശ്വത പരിഹാരം ഉണ്ടായില്ല. ജംഗ്‌ഷനിൽ ദേശീയപാത 66-ന്റെ നവീകരണ പ്രവർത്തനങ്ങൾ പുരോഗമിക്കുന്നതിനാൽ കണ്ണനല്ലൂർ റോഡിൽ വാഹനങ്ങളുടെ തിരക്ക് നിലവിലെന്നേക്കാൾ കൂടുതലാണ്. ഇതോടെ, കാൽനട യാത്രക്കാരുടെ സുരക്ഷ തന്നെ അപകടത്തിലാകുകയാണ്. നടപ്പാത കൈയേറ്റം മൂലം യാത്രക്കാർക്കും വ്യാപാരികൾക്കും ഒരുപോലെ കഷ്ടം അനുഭവപ്പെടുന്ന സാഹചര്യത്തിൽ, ഉദ്യോഗസ്ഥർ തൽസ്ഥിതിയെ ഗൗരവത്തോടെ വിലയിരുത്തി അടിയന്തിര നടപടികൾ സ്വീകരിക്കണമെന്ന് നാട്ടുകാർ ആവശ്യപ്പെടുന്നു.