അഷ്ടമുടിക്കായൽ തീരത്തെ അറവുശാല: സംസ്കരണ പ്ലാന്റ് വീണ്ടും പരീക്ഷണത്തിൽ! കമ്പനിക്ക് ഒരു അവസരം കൂടി നൽകാൻ കോർപ്പറേഷൻ; നഷ്ടം ഇത് വരെ നാലരക്കോടി

കൊല്ലം : അഷ്ടമുടിക്കായൽ തീരത്തെ കെ.എസ്.ആർ.ടി.സി ഡിപ്പോയ്ക്ക് സമീപമുള്ള അറവുശാലയിൽ അഞ്ചുവർഷം മുമ്പ് സ്ഥാപിച്ച മാംസാവശിഷ്ട സംസ്കരണ പ്ലാന്റ് (എഫ്ലുവന്റ് ട്രീറ്റ്മെന്റ് പ്ലാന്റ്) ട്രയൽ റൺ നടത്തി കമ്മീഷൻ ചെയ്യുന്നതിന് കരാർ കമ്പനിക്ക് കോർപ്പറേഷൻ ഒരവസരം കൂടി നൽകാൻ തീരുമാനിച്ചു. 2019 ജൂലായിൽ നടത്തിയ ആദ്യ ട്രയൽ റൺ പരാജയപ്പെട്ടതിനെ തുടർന്ന് അറ്റകുറ്റപ്പണികൾ നടത്തിയെങ്കിലും അതിനുശേഷം നടത്തിയ പരീക്ഷണവും ഫലമുണ്ടാക്കിയില്ല. പ്ലാന്റ് മൂന്ന് മാസം തുടർച്ചയായി ഫലപ്രദമായി പ്രവർത്തിച്ചാൽ മാത്രമേ അതിനെ പൂർണ സജ്ജമായതായി കോർപ്പറേഷൻ അംഗീകരിക്കൂ. ഇതോടെ ശേഷിക്കുന്ന കരാർ തുകയും നൽകും. എന്നാൽ വീണ്ടും പരാജയപ്പെട്ടാൽ കോർപ്പറേഷനുണ്ടായ നഷ്ടം കമ്പനിയിൽ നിന്ന് ഈടാക്കുന്നതിനുള്ള നിയമനടപടികൾ സ്വീകരിക്കാനാണ് തീരുമാനം.

'ഇ-കിഡ്' സാങ്കേതികവിദ്യ ഉപയോഗിച്ചാണ് പ്ലാന്റ് പ്രവർത്തനം. മൃഗങ്ങളെ കശാപ്പ് ചെയ്യുമ്പോൾ പുറത്ത് വരുന്ന സൂക്ഷ്മ ഖരപദാർത്ഥങ്ങൾ ഉൾക്കൊള്ളുന്ന ജലമാലിന്യം ആദ്യം ഭൂഗർഭ ടാങ്കിലെത്തിക്കും. പിന്നീട് പമ്പ് ചെയ്ത് തറനിരപ്പിലുള്ള ടാങ്കിലേക്ക് മാറ്റുന്നതിനിടെ ജലത്തിൽ നിന്നുള്ള ഖരപദാർത്ഥങ്ങൾ പൂർണമായും വേർതിരിക്കും. തുടർന്ന് ഇലക്ട്രോഡുകൾ ഉപയോഗിച്ച് മലിനജലം ശുദ്ധീകരിച്ചശേഷം അതിലെ രക്തവും മറ്റ് ഘടകങ്ങളും പൂർണമായും നീക്കം ചെയ്യും. ഇതിന് ശേഷമുള്ള ശുദ്ധജലം പ്ലാന്റിലെ ശുചീകരണ പ്രവർത്തനങ്ങൾക്കായി ഉപയോഗിക്കാനും ഖരമാലിന്യം പ്ലാന്റിൽത്തന്നെ സംസ്കരിച്ച് വളമായി വിൽക്കാനുമാണ് പദ്ധതി. പ്ലാന്റിന്റെ കരാർ തുക 29.50 ലക്ഷം രൂപ ആയിരുന്നു, ഇതിൽ 25.21 ലക്ഷം രൂപ ഇതിനകം കമ്പനിക്ക് നൽകിയിട്ടുണ്ട്.

2018 ജൂലായിൽ പ്രദേശവാസികളുടെ ഹർജിയിന്മേൽ ഹൈക്കോടതി അറവുശാല അടച്ചുപൂട്ടാൻ ഉത്തരവിട്ടതോടെ കോർപ്പറേഷനു വൻ സാമ്പത്തിക നഷ്ടം നേരിടേണ്ടിവന്നു. ആ വർഷം 56.25 ലക്ഷം രൂപയുടെ ലേലത്തുകയായിരുന്നു അറവുശാലയുമായി ബന്ധപ്പെട്ട് ഉറപ്പിച്ചത്. ആറ് ഇറച്ചിസ്റ്റാളുകൾ എട്ടു ലക്ഷം രൂപയ്ക്ക് ലേലം പോയെങ്കിലും അതിന് ശേഷം അറവുശാലയും സ്റ്റോളുകളും ലേലം ചെയ്യാനായില്ല. ഇതോടെ 4.60 കോടിയുടെ നഷ്ടം കോർപ്പറേഷനെ ബാധിച്ചിരിക്കുകയാണ്.