എട്ടാം ക്ലാസിന്റെ വാർഷിക പരീക്ഷാഫലം ഇന്ന്; 30 ശതമാനം മാർക്ക് നേടാത്ത വിദ്യാർത്ഥികൾ വീണ്ടും പരീക്ഷ എഴുതണം

തിരുവനന്തപുരം : എട്ടാം ക്ലാസിന്റെ വാർഷിക പരീക്ഷാഫലം ഇന്ന് പ്രഖ്യാപിക്കും. ഓരോ വിഷയത്തിലും കുറഞ്ഞത് 30 ശതമാനം മാർക്ക് നേടാത്ത വിദ്യാർത്ഥികളുടെ വിവരങ്ങൾ നാളെ രക്ഷാകർത്താക്കൾക്ക് അറിയിക്കും. ഇത്തരത്തിലുള്ള കുട്ടികൾക്ക് ഏപ്രിൽ 8 മുതൽ 24 വരെ അധിക ക്ലാസുകൾ നൽകും. പുനഃപരീക്ഷ ഏപ്രിൽ 25 മുതൽ 28 വരെയാണ് നടത്തുക. ഫലപ്രഖ്യാപനം ഏപ്രിൽ 30ന് നടക്കും.

സംസ്ഥാനത്തെ 1229 സർക്കാർ, 1434 എയ്ഡഡ്, 473 അൺഎയ്ഡഡ് സ്‌കൂളുകളിലായി പൊതുവിദ്യാഭ്യാസ വകുപ്പ് മേൽനോട്ടം വഹിച്ചാണ് എട്ടാം ക്ലാസിന്റെ വാർഷിക പരീക്ഷ നടന്നത്. എഴുത്തുപരീക്ഷയിൽ ഓരോ വിഷയത്തിലും കുറഞ്ഞത് 30 ശതമാനം മാർക്ക് നേടാനാണ് ക്രമീകരണം. ആവശ്യമായ മാർക്ക് നേടാനാകാത്ത വിഷയങ്ങളിൽ വിദ്യാർത്ഥികൾ നിർബന്ധമായും അധിക പിന്തുണാ ക്ലാസുകളിൽ പങ്കെടുക്കണം. ഈ ക്ലാസുകൾ രാവിലെ 9.30 മുതൽ 12.30 വരെയാണ് നടത്തുക.

ഓരോ സ്‌കൂളിലെയും സാഹചര്യങ്ങളെ മാനിച്ചുകൊണ്ടാണ് അധ്യാപകരുടെയും രക്ഷകർത്താക്കളുടെയും ജനപ്രതിനിധികളുടെയും സഹകരണത്തോടെ ഈ ക്ലാസുകൾ സംഘടിപ്പിക്കുന്നതെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി അറിയിച്ചു. ജില്ലാ തലത്തിലും സംസ്ഥാന തലത്തിലും പൊതുവിദ്യാഭ്യാസ ഡയറക്ടർ, മറ്റ് ഉദ്യോഗസ്ഥർ, അധ്യാപകർ, അധ്യാപക സംഘടനാ നേതാക്കൾ എന്നിവരുടെ പങ്കാളിത്തത്തോടെ യോഗങ്ങൾ വിളിച്ചു ചേർത്തതിൽ നിന്ന് മികച്ച പിന്തുണ ലഭിച്ചതായും എം.എൽ.എമാരുടെയും മറ്റു ജനപ്രതിനിധികളുടെയും പിന്തുണയുണ്ടെന്നുമാണ് മന്ത്രി വ്യക്തമാക്കിയത്.