97 ലക്ഷത്തിലധികം വാട്സ്ആപ്പ് അക്കൗണ്ടുകൾ ഇന്ത്യയിൽ ബ്ലോക്ക് ചെയ്തു; ഇത്തരം കുറ്റക്കാര്‍ക്കെതിരെ ശക്തമായ നടപടി സ്വീകരിക്കുകയാണെന്ന് മെറ്റ

ന്യൂഡൽഹി : 2025 ഫെബ്രുവരി മാസത്തിൽ പ്ലാറ്റ്‌ഫോമിന്‍റെ നിബന്ധനകളും വ്യവസ്ഥകളും ലംഘിച്ചതിന് 97 ലക്ഷത്തിലധികം വാട്സ്ആപ്പ് അക്കൗണ്ടുകൾ ഇന്ത്യയിൽ ബ്ലോക്ക് ചെയ്തതായി മെറ്റ അറിയിച്ചു. രാജ്യത്ത് സൈബര്‍ തട്ടിപ്പുകളും ഓണ്‍ലൈന്‍ പ്ലാറ്റ്ഫോമുകളുടെ ദുരുപയോഗവും വര്‍ധിച്ചുവരുന്ന സാഹചര്യത്തില്‍ കുറ്റക്കാര്‍ക്കെതിരെ ശക്തമായ നടപടി സ്വീകരിക്കുകയാണ് ജനപ്രിയ മെസേജിംഗ് പ്ലാറ്റ്‌ഫോമായ വാട്സ്ആപ്പ്.

ചട്ടലംഘനങ്ങൾക്കും ദുരുപയോഗത്തിനുമെതിരായ നടപടി

വാട്സ്ആപ്പിനെതിരെ ഉപയോക്താക്കൾ നൽകിയ പരാതികളുടെ അടിസ്ഥാനത്തിലാണ് മിക്ക അക്കൗണ്ടുകളും പൂട്ടിയത്. 2021-ലെ ഐടി നിയമങ്ങൾ അനുസരിച്ച്, ഉപയോക്താക്കളുടെ റിപ്പോർട്ടുകൾ പരിഗണിച്ചാണ് ഈ നടപടികൾ ഏറ്റെടുത്തതെന്ന് കമ്പനി അറിയിച്ചു. എന്നാൽ, ഏതാനും അക്കൗണ്ടുകൾക്കെതിരെ ഉപയോക്താക്കളുടെ പരാതികൾ ഒന്നുമില്ലാതെയും വാട്സ്ആപ്പ് സ്വമേധയാ നടപടി സ്വീകരിച്ചു. ഫെബ്രുവരി മാസത്തിൽ മാത്രം 1.4 ദശലക്ഷത്തിലധികം അക്കൗണ്ടുകൾ വാട്സ്ആപ്പ് ഈ രീതിയിലായാണ് പൂട്ടിയത്.

50 കോടിയിലധികം ഉപയോക്താക്കൾ, എന്നാൽ എല്ലാവരും നിയമാനുസൃതമല്ല

ഇന്ത്യയിൽ വാട്സ്ആപ്പിന് 50 കോടിയിലധികം ഉപയോക്താക്കൾ ഉണ്ടെന്ന കണക്കുകൾ കാണിക്കുന്നു. എന്നാൽ ഇവയിൽ എല്ലാ അക്കൗണ്ടുകളും നിയമാനുസൃതമായി പ്രവർത്തിക്കുന്നവയല്ല. സൈബർ തട്ടിപ്പ് സംഘങ്ങൾ വാട്സ്ആപ്പ് വ്യാപകമായി ദുരുപയോഗം ചെയ്യുന്നതായി നിരീക്ഷണമുണ്ട്. ഈ സാഹചര്യത്തിലാണ് മെറ്റ പ്രതിമാസം നിരീക്ഷണം ശക്തമാക്കുകയും ചട്ടലംഘകരായ അക്കൗണ്ടുകൾ നിരോധിക്കുകയും ചെയ്യുന്നത്.

എഐ സഹായത്തോടെ സുരക്ഷാ സംവിധാനം ശക്തമാക്കുന്നു

വാട്സ്ആപ്പ് വർഷങ്ങളായി ആർട്ടിഫിഷ്യൽ ഇന്റലിജൻസിൽ (AI) വലിയ നിക്ഷേപം നടത്തിവരികയാണ്. ഉപയോക്താക്കളുടെ സുരക്ഷ ഉറപ്പാക്കുന്നതിനും ചട്ടലംഘനം നേരത്തെ തിരിച്ചറിയുന്നതിനുമായി മെറ്റയുടെ എഐ സംവിധാനങ്ങൾ സഹായിക്കുന്നു. സംശയാസ്പദമായ പ്രവർത്തനങ്ങൾ കണ്ടെത്താൻ ഒരൊറ്റോമായ ഡിറ്റക്ഷൻ സിസ്റ്റം (Automated Detection System) കമ്പനിയിലുണ്ട്. ഈ എഐ ടൂളുകൾ വഴി കമ്പനി സൈബർ കുറ്റവാളികൾ ആപ്പിന്റെ ദുരുപയോഗം നടത്തുന്നതായി തിരിച്ചറിയുന്ന അക്കൗണ്ടുകൾ പ്രതിമാസം നിരീക്ഷിക്കുകയും അവ പൂട്ടുകയും ചെയ്യുന്നു.

സ്പാം, തേർഡ് പാർട്ടി ആപ്പുകൾ: പ്രധാന പരാതികൾ

വാട്സ്ആപ്പിന് ലഭിക്കുന്ന പരാതികളിൽ ഭൂരിഭാഗവും സ്പാമിംഗ്, തേർഡ് പാർട്ടി ആപ്പുകളുടെ ഉപയോഗം, അനുമതിയില്ലാതെ ഗ്രൂപ്പുകളിൽ ചേർക്കൽ തുടങ്ങിയവയുമായി ബന്ധപ്പെട്ടവയാണ്. ഇത്തരം പരാതികൾ വാട്സ്ആപ്പ് വിശദമായി പരിശോധിക്കുകയും നിബന്ധനകൾ ലംഘിച്ച അക്കൗണ്ടുകൾക്ക് എതിരെ നടപടികൾ സ്വീകരിക്കുകയും ചെയ്യുന്നു. പ്രതിമാസ നിരീക്ഷണത്തിന്റെ ഭാഗമായാണ് ഫെബ്രുവരി മാസത്തിൽ മാത്രം 97 ലക്ഷത്തിലധികം അക്കൗണ്ടുകൾ ഇന്ത്യയിൽ വാട്സ്ആപ്പ് പൂട്ടിയത്. അതേസമയം, ഉപയോക്താക്കളുടെ സ്വകാര്യതയും സുരക്ഷയും ശക്തിപ്പെടുത്തുന്നതിനുള്ള കൂടുതൽ നടപടികൾ നടപ്പിലാക്കുമെന്നാണ് വാട്സ്ആപ്പിന്റെ ഉറപ്പ്.