കൊല്ലത്ത് മൊബൈൽ ഫോണിൽ സംസാരിക്കുന്നതിനിടെ കാൽ വഴുതി അപകടം; കിണറ്റിൽ വീണ യുവാവിനെ പുറത്തെടുത്തത് ഫയർഫോഴ്സിൻ്റെയും നാട്ടുകാരുടെയും സഹായത്തോടെ; പരിക്ക്

ഓയൂർ : കരിങ്ങന്നൂരിൽ മൊബൈൽ ഫോണിൽ സംസാരിക്കുന്നതിനിടയിൽ കാൽ വഴുതി കിണറ്റിൽ വീണ യുവാവിനെ നാട്ടുകാരുടെയും പൊലീസിന്റെയും അഗ്നിശമന സേനയുടെയും ചേർന്ന പരിശ്രമം രക്ഷിച്ചു. കരിങ്ങന്നൂർ വികാസ് ഭവനിലെ വികാസ് (32) ആണ് ശനിയാഴ്ച രാത്രി 12 മണിയോടെ കിണറ്റിൽ വീണത്.

വക്ക് കെട്ടിയ കിണറിന്റെ തീരത്ത് ചാരിനിന്ന് മൊബൈലിൽ സംസാരിക്കുകയായിരുന്നു വികാസ്. ഈ സമയത്താണ് ബാലൻസ് തെറ്റി 15 അടിയോളം വെള്ളമുള്ള കിണറ്റിലേക്ക് വീഴുന്നത്. ശബ്ദം കേട്ട് എത്തിയ വികാസിന്റെ അമ്മ ആണ് മകൻ കിണറ്റിൽ വീണതെന്നത് ആദ്യം തിരിച്ചറിയുന്നത്. അമ്മയുടെ നിലവിളി കേട്ട് അയൽവാസികൾ ഓടിയെത്തി കിണറ്റിൽ തടി ഏണി കെട്ടിയിറക്കിക്കൊടുത്തു. ഈ ഏണിയിൽ കയറിനിന്ന് വികാസ് കിണറ്റിനകത്ത് രക്ഷപ്പെടാൻ ശ്രമിച്ചു.

വിവരം ലഭിച്ചതിനെ തുടർന്ന് പൂയപ്പള്ളി പൊലീസ് സ്ഥലത്തെത്തി. നാവായിക്കുളത്തുനിന്നെത്തിയ അഗ്നിശമന സേനാംഗങ്ങളും ചേർന്ന് വികാസിനെ സുരക്ഷിതമായി കരക്കെത്തിച്ചു. തുടർന്ന് അദ്ദേഹത്തെ ആശുപത്രിയിൽ പ്രവേശിപ്പിച്ചു. വിദേശത്തേക്ക് ജോലി തേടിപ്പോകാൻ തയ്യാറെടുക്കുന്ന സമയത്താണ് അപകടം സംഭവിച്ചത്.