ഇംഗ്ലീഷ് പ്രീമിയർ ലീഗ്: മാഞ്ചസ്റ്റർ ഡെർബി ഗോൾരഹിതം; ഫുൾഹാമിന്റെ ഷോക്കിൽ ലിവർപൂൾ

മാഞ്ചസ്റ്റർ : ആരാധകർ കാത്തിരുന്ന മാഞ്ചസ്റ്റർ ഡെർബി ഗോൾ രഹിത സമനിലയിൽ അവസാനിച്ചു. മാഞ്ചസ്റ്റർ യുനൈറ്റഡിന്റെ തട്ടകമായ ഓൾഡ് ട്രാഫോഡിൽ നടന്ന മത്സരത്തിൽ ഇരുടീമുകളും മികച്ച അവസരങ്ങൾ സൃഷ്ടിച്ചെങ്കിലും ഗോൾ നേടാൻ കഴിയാതെ മത്സരം ഗോൾരഹിത സമനിലയിൽ അവസാനിച്ചു. പന്തടക്കത്തിലും പാസിങ്ങിലും മുൻതൂക്കം പിടിച്ചത് മാഞ്ചസ്റ്റർ സിറ്റിയായിരുന്നുവെങ്കിലും, അതിവേഗ കൌണ്ടർ അറ്റാക്കുകൾ വഴിയുള്ള കൂടുതൽ അപകടകാരിയായ നീക്കങ്ങൾ മാഞ്ചസ്റ്റർ യുനൈറ്റഡാണ് നടത്തിയതെന്ന് കളി വിലയിരുത്തിയ റിപ്പോർട്ടുകൾ സൂചിപ്പിക്കുന്നു. 31 മത്സരങ്ങളിൽ നിന്ന് 52 പോയന്റുമായി മാഞ്ചസ്റ്റർ സിറ്റി ലീഗിൽ അഞ്ചാം സ്ഥാനത്താണ്. യുനൈറ്റഡ് 38 പോയന്റുമായി 13ാം സ്ഥാനത്താണ് തുടരുന്നത്.

അതേ സമയം ടേബിളിൽ ഒന്നാമതായ ലിവർപൂൾ ഫുൾഹാമിനോട് 3-2 ന് തോറ്റത് വലിയ ഷോക്കായി. അലക്സിസ് മക് അലിസ്റ്ററിന്റെ ഗോളിലൂടെ ലീഡ് നേടിയ ചെമ്പടകൾക്ക് പിന്നീടുള്ള സമയം ദുഃസ്വപ്നമായി. റ്യാൻ സെസഗ്നോൻ (23), അലക്സ് ഇവോബി (32), റോഡ്രിഗോ മുനിസ് (37) എന്നിവരുടെ ഗോളുകളിലൂടെയാണ് ഫുൾഹാം മത്സരത്തിന്റെ മുഖം തിരിച്ചത്. 72ാം മിനിറ്റിൽ ലൂയിസ് ഡയസ് ഒരു ഗോൾ തിരിച്ചടിച്ചെങ്കിലും അതിനുശേഷം ലിവർപൂൾ സ്കോർ ബോർഡിൽ മാറ്റം വരുത്താനായില്ല. 31 മത്സരങ്ങളിൽ 73 പോയന്റുള്ള ലിവർപൂൾ ഒന്നാം സ്ഥാനത്ത് തുടർന്നുകൊണ്ടിരിക്കുകയാണ്. രണ്ടാം സ്ഥാനത്തുള്ള ആഴ്സനലിന് 62 പോയന്റാണ് ഉള്ളത്.

ചെൽസിയുമായി നടന്ന മത്സരത്തിൽ ബ്രെന്റ്‌ഫോർഡ് ഗോൾ രഹിത സമനിലയിൽ തളച്ചു. ടോട്ടനം സതാംപ്ടൺതിരേ 3-1ന്റെ വിജയം നേടി. 20 മത്സരങ്ങളിൽ നിന്നും വെറും 10 പോയിന്റ് മാത്രമുള്ള സതാംപ്ടൺ ഈ സീസണിൽ തരംതാഴ്ത്തപ്പെടുന്നതായി ഉറപ്പായിരിക്കുകയാണ്.