ഇനി ജില്ലകളിലും രാഷ്ട്രീയകാര്യ സമിതി; കോൺഗ്രസിന്റെ ഡിസിസി ശാക്തീകരണം ജനസമ്പര്‍ക്കത്തിൽ കേരള മാതൃകയിൽ

തിരുവനന്തപുരം : ഡിസിസി ശാക്തീകരണത്തിന്റെ ഭാഗമായി ജില്ലകളിലും രാഷ്ട്രീയകാര്യ സമിതി രൂപീകരിക്കുമെന്ന് കോൺഗ്രസ് പ്രഖ്യാപിച്ചു. ഇപ്പോൾ വരെ പിസിസികളിലേയ്ക്ക് മാത്രം പരിമിതമായിരുന്ന രാഷ്ട്രീയ കാര്യ സമിതിയെ ഡിസിസികളിലേക്കും വ്യാപിപ്പിക്കാനുള്ള തീരുമാനം എഐസിസി എടുത്തതായി ജനറൽ സെക്രട്ടറി ജയറാം രമേശ് അറിയിച്ചു.

കേരള മാതൃകയിൽ ആധാരപ്പെടുത്തി ശാക്തീകരണ നടപടികൾ നടക്കുമെന്നും, ജനസമ്പർക്കം, ഫണ്ട് സ്വരൂപിക്കൽ തുടങ്ങിയ മേഖലകളിലാണ് ഈ മാതൃക പ്രയോജനപ്പെടുത്തുന്നതെന്നും അദ്ദേഹം പറഞ്ഞു. കേരളം ഉൾപ്പെടെയുള്ള സംസ്ഥാനങ്ങളിൽ ഈ നടപടി വ്യാപിപ്പിക്കാനാണ് പാർട്ടി ഉദ്ദേശിക്കുന്നത്.

ഡിസിസി ശാക്തീകരണ പ്രവർത്തനങ്ങൾ ആദ്യമായി ആരംഭിച്ച ഗുജറാത്തിൽ, മെയ് 31ന് പുതിയ ഡിസിസി അധ്യക്ഷന്മാരെ പ്രഖ്യാപിക്കുമെന്നും, മണ്ഡലങ്ങളിൽ മത്സരിക്കാൻ ഡിസിസി അധ്യക്ഷന്മാർക്ക് വിലക്കില്ലെന്നും ജയറാം രമേശ് വാർത്താസമ്മേളനത്തിൽ വ്യക്തമാക്കി.